హరియాణాలో మరోసారి అధికారం చేపట్టడమే లక్ష్యంగా భారతీయ జనతా పార్టీ ఎన్నికల ప్రణాళికను విడుదల చేసింది. తమకు రెండోసారి అధికారం అప్పగిస్తే చేయబోయే పనులు వివరిస్తూ 'సంకల్ప్ పాత్ర' పేరుతో భాజపా కార్యనిర్వాహక అధ్యక్షుడు జేపీ నడ్డా, హరియాణా ముఖ్యమంత్రి మనోహర్లాల్ ఖట్టర్ సహా పార్టీ రాష్ట్ర ముఖ్యనేతలు మేనిఫెస్టోను విడుదల చేశారు. అన్నివర్గాల అభివృద్ధే లక్ష్యంగా ఎన్నికల ప్రణాళిక రూపొందించినట్లు జేపీ నడ్డా తెలిపారు.
- 'హరియాణా కలల ప్రణాళిక’ అనే ఈ మేనిఫెస్టోలో రైతులు, కార్మికులు, పారిశ్రామిక వేత్తలకు సరైన న్యాయం చేస్తామని ఉద్ఘాటించారు నేతలు.
- ప్రధానంగా వ్యవసాయ ఆధారిత రాష్ట్రమైన నేపథ్యంలో రైతులకు రూ. 3 లక్షల వరకూ వడ్డీ లేని రుణాలు అందిస్తామని మేనిఫెస్టోలో పేర్కొన్నారు.
ఎన్నికల ప్రణాళికలోని ప్రధాన అంశాలు:
- 2022 నాటికి రైతుల ఆదాయం రెట్టింపు.
- 25 లక్షల మంది యువతకు ఉద్యోగాల సాధన కోసం ఉచితంగా నైపుణ్య శిక్షణ. దీని వల్ల ప్రభుత్వంపై రూ.500 కోట్ల భారం పడనుంది. పరిశ్రమల్లో 95% ఉద్యోగాలు స్థానికులకు ఇచ్చేలా నిబంధనలు తీసుకురావడం వంటి అంశాలను చేర్చారు.
- ఎస్సీలకు రూ. 3 లక్షల వడ్డీ లేని రుణం.
- రూ. 3వేల కోట్లతో వృద్ధాప్య పింఛను.
- 2022 నాటికి హరియాణాను క్షయవ్యాధి నుంచి విముక్తి లక్ష్యం.
- ఆరోగ్య సంరక్షణ చర్యల్లో భాగంగా 2వేల వెల్‌నెస్‌ కేంద్రాల ఏర్పాటు.
- వెయ్యి క్రీడా కేంద్రాల ఏర్పాటు.
ఇదీ చూడండి: మహిళను సజీవ దహనం చేసిన గ్రామస్థులు..!
