చిరకాల మిత్రులతో విభేదాలు.. భాజపాకు నష్టమెంత?

భాజపా నేతృత్వంలోని ఎన్డీఏ ప్రభుత్వం.. ఏడాది కాలంలో రెండు కీలక మిత్రపక్షాలను దూరం చేసుకుంది. వ్యవసాయ చట్టంపై నిరసనగా భాజపాతో అకాలీదళ్​ తెగదెంపులు చేసుకోగా.. మహారాష్ట్ర ఎన్నికల వ్యవహారంలో శివసేన ఎన్డీఏను వీడింది. అయితే ఈ పార్టీల నిర్ణయంతో ప్రధాని మోదీ ప్రభుత్వానికి ముప్పు లేదని రాజకీయ నిపుణులు చెబుతున్నారు. కానీ సిద్ధాంతాల పరంగా ముఖ్యమైన పార్టీలు వీడటం భాజపాకు ఆందోళన కలిగించే విషయమని అభిప్రాయపడుతున్నారు.

శిరోమణి అకాలీదళ్​, శివసేన.. దేశ రాజకీయాల్లో ఎన్నో దశాబ్దాల పాటు భాజపా వెన్నంటే నిలిచిన పార్టీలివి. ఎన్నో కీలక సమయాల్లో భాజపాతో తమ బంధాన్ని ఈ పార్టీలు చాటిచెప్పాయి కూడా. కానీ ఇప్పుడు పరిస్థితులు మారిపోయాయి. ఏడాదిలోనే ఈ రెండు పార్టీలు భాజపాతో తెగదెంపులు చేసుకున్నాయి. మరి ఈ పరిణామాలతో భాజపాకు నష్టం కలుగుతుందా? అసలు ఈ పార్టీలు భాజపాను ఎందుకు వీడాయి?

బిల్లులు.. కలహాలు..

వ్యవసాయ రంగంలో సంస్కరణల కోసం కేంద్రం తీసుకొచ్చిన చట్టాలపై శిరోమణి అకాలీదళ్​ అసంతృప్తి వ్యక్తం చేసింది. వీటితో రైతులు తీవ్రంగా నష్టపోతారని ఆవేదన వ్యక్తం చేసింది. వెంటనే వీటిని ఉపసంహరించుకోవాలని భాజపాకు తేల్చిచెప్పింది. అయినప్పటికీ ఈ విషయంలో భాజపా ముందుకు వెళ్లింది. ఈ నేపథ్యంలో భాజపా నేతృత్వంలోని ఎన్డీఏను వీడుతున్నట్టు అకాలీదళ్ శనివారం​ ప్రకటించింది.

మరోవైపు గతేడాది 'మహా' ఎన్నికల వ్యవహారంలో భాజపా-శివసేన మధ్య కలహాలు ఏర్పడ్డాయి. ముఖ్యమంత్రి పీఠాన్ని పంచుకునే అంశంపై భాజపాతో జరిగిన చర్చలు విఫలమవడం, ఆ తర్వాత జరిగిన పరిణామాల పట్ల ఆగ్రహించిన శివసేన.. ఆ పార్టీతో పొత్తును ముగించుకుంది. ఎన్​సీపీ-కాంగ్రెస్​తో కలిసి ప్రభుత్వాన్ని ఏర్పాటు చేసింది.

భాజపాకు నష్టమేనా?

ఈ పార్టీలతో విభేదాలు ఏర్పడటం వల్ల ప్రధానమంత్రి నరేంద్ర మోదీ నేతృత్వంలోని ఎన్డీఏ ప్రభుత్వానికి ఎలాంటి నష్టం లేదు. కానీ సిద్ధాంతాల పరంగా.. ఈ రెండు పార్టీలు భాజపాకు ఎంతో కీలకం. ఈ కోణంలో చూస్తే వీటి స్థానాన్ని భర్తీ చేసే మిత్రపక్షాలు భాజపాకు లేవనే చెప్పుకోవాలి.

అదే సమయంలో సరిహద్దు రాష్ట్రమైన పంజాబ్​లో అకాలీలకు ప్రాముఖ్యత ఎక్కువే. అకాలీదళ్​తో కలిసి ఉండటం వల్ల భాజపాకు రాజకీయం పరంగా ఇన్నేళ్లు మేలే జరిగిందని రాజకీయ నిపుణులు చెబుతున్నారు. ఇరు పార్టీలు కలిసి వివిధ వర్గాల ఓటర్లను ఆకర్షించేవని.. ఇప్పుడు అకాలీదళ్​ తప్పుకోవడం వల్ల భాజపా రాజకీయపరంగా నష్టపోయే అవకాశమున్నట్టు అభిప్రాయపడుతున్నారు.

ఇదీ చూడండి:- వ్యవసాయ బిల్లులకు రాష్ట్రపతి ఆమోదం

అయితే ఈ గండం నుంచి భాజపా గట్టెక్కుతుందని మరికొందరు భావిస్తున్నారు. అకాలీదళ్​ అధ్యక్షుడు సుఖ్​బీర్​ బాదల్​ నాయకత్వం.. పార్టీలో కొందరికి నచ్చడం లేదని.. ఫలితంగా అసంతృప్తి వర్గాన్ని భాజపా ఆకర్షించే అవకాశముందని రాజకీయ నిపుణులు చెబుతున్నారు. కానీ వ్యవసాయ చట్టాలపై నిరసనలు చెలరేగుతున్న తరుణంలో ఇది కొంత కష్టమైన వ్యవహారమని అభిప్రాయపడుతున్నారు.

జేడీయూ వైపే చూపు...

అకాలీదళ్​, శివసేన వీడ్కోలు పలకడం వల్ల ఇప్పుడు ఆ 'చిరకాల మిత్రపక్ష' స్థానాన్ని జేడీయూ దక్కించుకుంది. 2013-17 మినహా అధ్యక్షుడు నితీశ్​ కుమార్​.. ఎన్డీఏతోనే కలిసి ఉన్నారు. ప్రస్తుతం కూటమిలో ఆయన ఓ శక్తింతమైన సభ్యుడు కూడా.

'ఇది అసలు కూటమే కాదు...'

ఎన్డీఏను శిరోమణి అకాలీదళ్​ వీడటంపై శివసేన సీనియర్​ నేత సంజయ్​ రౌత్​ స్పందించారు. శివసేన, అకాలీదళ్​ పార్టీలు ఎన్నో ఏళ్ల పాటు భాజపాకు మద్దతుగా నిలిచాయని.. ఇప్పుడు అవి లేకపోవడం వల్ల తన దృష్టిలో అసలు ఎన్డీఏ కూటమే కాదని విమర్శించారు.

అయితే మిత్రపక్షాలు వైదొలగడంపై తన వైఖరిని భాజపా మరోమారు స్పష్టం చేసింది. 'శివసేనకు సీఎం కుర్చీని ఇవ్వలేము.. అదే సమయంలో అభివృద్ధిలో కీలకమైన వ్యవసాయ సంస్కరణలను వెనక్కి తీసుకోలేమ'ని ఓ భాజపా నేత తెలిపారు. ఈ విషయంలో తమ పార్టీ తప్పులేదని తేల్చిచెప్పారు.

ఇదీ చూడండి:- వ్యవసాయ బిల్లులపై అవగాహనకు భాజపా ప్రచారాలు