బంగాల్లో భాజపా కార్యకర్త అనుమానస్పద మృతి కలకలం సృష్టించింది. తూర్పు బర్ధమాన్లోని తన ఇంటి సమీపంలో భాజపా కార్యకర్త సుఖ్దేవ్ ప్రమాణిక్ మృతదేహం లభ్యమైంది. రెండురోజుల క్రితం భాజపా ఆధ్వర్యంలో జరిగిన ఓ ర్యాలీ అనంతరం సుఖ్దేవ్ అదృశ్యమవ్వగా.. పూర్వాస్థలి ప్రాంతంలోని ఓ చెరువులో విగతజీవిగా కనిపించాడు. పోస్టుమార్టం కోసం సుఖ్దేవ్ మృతదేహాన్ని ఆసుపత్రికి తరలించారు పోలీసులు.
అయితే.. సుఖ్దేవ్ను అధికార తృణమూల్ కాంగ్రెస్(టీఎంసీ) నేతలే హత్య చేశారని భాజపా ఆరోపించింది. ఈ విషయమై.. సోమవారం పెద్ద ఎత్తున ఆందోళన నిర్వహిస్తామని నేతలు తెలిపారు. నిందితులను వెంటనే శిక్షించాలని డిమాండ్ చేశారు. భాజపా ఆరోపణలను టీఎంసీ ఖండించింది. రానున్న ఎన్నికల్లో లబ్ధి కోసం ప్రతి అనుమానస్పద మృతిని తమ పార్టీపై నెట్టేందుకు భాజపా యత్నిస్తోందని దుయ్యబట్టింది. ఈ ఘటనపై స్పందించిన రాష్ట్ర మంత్రి, ఆ పార్టీ నేత ఫిర్హాద్ హకీమ్.. తమ పార్టీ హత్యారాజకీయాలకు పాల్పడదని పేర్కొన్నారు.
మరో భాజపా నేత సైకత్ భావల్ హత్య జరిగిన మరుసటిరోజే.. సుఖ్దేవ్ మృతదేహం లభ్యం కావడం గమనార్హం. ఉత్తర 24 పరగణాల జిల్లాలో జరిగిన ఓ దాడిలో సైకత్ మృతి చెందారు.
ఇదీ చూడండి:భాజపా అధ్యక్షుడు నడ్డాకు కరోనా
