వచ్చే నెలలో జరగబోయే బిహార్ శాసనసభ ఎన్నికల్లో తమకు అధికారం కట్టబెడితే 10 లక్షల ప్రభుత్వ ఉద్యోగాలిస్తామని ఆర్జేడీ సీఎం అభ్యర్థి తేజస్వీ యాదవ్ ప్రకటించారు. విలేకరుల సమావేశంలో ఆయన ఈ మేరకు వాగ్దానం చేశారు.
"ఇది నీటిపై మాటల్లాంటి వాగ్దానం కాదు. మా దృఢ సంకల్పంతో ఇచ్చిన ప్రతి హామీని నెరవేరుస్తాం. మేం ప్రకటించిన ఉద్యోగ నియామకానికి.. అధికారం చేపట్టిన తర్వాత నిర్వహించే తొలి కేబినెట్ సమావేశంలోనే అనుమతులు జారీ చేస్తాం. ఈ అంశం గురించి ఇప్పటికే ఆర్థిక వేత్తలతో సంప్రదింపులు జరిపాం. ఇది సాధించగలిగే లక్ష్యమే. త్వరలో దీనికి సంబంధించిన కార్యచరణ నమూనాతో ప్రజల ముందుకు వస్తాం." అని తేజస్వీ స్పష్టం చేశారు.
'ప్రతిపక్షాలతోనే కలిసి'
బిహార్ శాసనసభ ఎన్నికల్లో ప్రతిపక్షాలతోనే కలిసి నడుస్తామని లోక్ తాంత్రిక్ జనతాదళ్(ఎల్జేడీ) వ్యవస్థాపకుడు శరద్ యాదవ్ అన్నారు. వచ్చే అసెంబ్లీ ఎన్నికలలో జేడీయూతో చేతులు కలుపుతామని వచ్చిన వార్తలను ఆయన తోసిపుచ్చారు. బిహార్ ఎన్నికలు, ఇతర రాష్ట్రాల్లో జరగబోయే మధ్యంతర ఎన్నికలలో లౌకిక శక్తులను ఒకే తాటిపైకి తీసుకురావడానికి గట్టిగా కృషి చేస్తామని ఆయన ఓ ప్రకటనలో తెలిపారు. కేంద్రం అనుసరిస్తున్న రైతు వ్యతిరేక విధానాలపై నిరసన గళం వినిపిస్తామని స్పష్టం చేశారు. కేంద్రం తీసుకొచ్చిన వ్యవసాయ బిల్లులను.. గ్రామీణ ఆర్థిక వ్యవస్థపై చేస్తున్న దాడిగా అభివర్ణించారు శరద్.
జేడీయూ అధ్యక్షుడిగా అశోక్ చౌధురి
జేడీయూ బిహార్ అధ్యక్షుడిగా రాష్ట్ర భవన నిర్మాణ శాఖ మంత్రి అశోక్ చౌధురి నియమితులయ్యారు. ఈ మేరకు పార్టీ కార్యాలయంలో రాష్ట్ర ముఖ్యమంత్రి నితీశ్ కుమార్ ప్రకటించారు. అంతకముందు ఆ పదవిలో ఉన్న వశిష్ఠ నారాయణ్ సింగ్ చాలా కాలంగా అనారోగ్యంతో బాధపడుతూ దిల్లీలో చికిత్స పొందుతున్న కారణంగా.. అశోక్ చౌధురిని నియమించారు. అసెంబ్లీ ఎన్నికలకు ముందు రాష్ట్రంలో పార్టీ బలోపేతానికి ఈ నిర్ణయం తీసుకున్నట్టు రాజకీయ వర్గాలు భావిస్తున్నాయి.
సీట్ల సర్దుబాటులో గందరగోళం
బిహార్ అసెంబ్లీ ఎన్నికల తేదీలు ఖరారైన నేపథ్యంలో రాజకీయ పార్టీలన్నీ పోటీ చేసే స్థానాలపై సమాలోచనలు ప్రారంభించాయి. అయితే.. ఎన్డీఏ, మహాకూటమిలలో సర్దుబాటులో గందర గోళం నెలకొంది. మహాకూటమిలోని చాలా పార్టీలు ఆర్జేడీపై ఆగ్రహంతో ఉన్నట్టు తెలుస్తోంది. కాంగ్రెస్ స్క్రీనింగ్ కమిటీ ఛైర్మన్ అవినాష్ పాండే ఇటీవల బిహార్లో పర్యటించారు. అయితే.. మహాకూటమిలో కాంగ్రెస్కు గౌరవప్రదమైన సంఖ్యలో సీట్లు కేటాయించకపోతే.. రాష్ట్రంలో అన్ని స్థానాల్లో ఒంటరిగా పోటీ చేయడానికి పార్టీ సిద్ధంగా ఉందని అవినాష్ స్పష్టం చేశారు. మరోవైపు మహాకూటమి నుంచి 'హామ్' పార్టీ జాతీయ అధ్యక్షుడు జితన్ రాం మాంఝీ వైదొలగి ఎన్డీఏలో చేరారు. ఉపేంద్ర కుశ్వాహ కూడా మహాకూటమి నుంచి బయటకు వెళ్లాలని యోచిస్తున్నారు.
ఇదీ చదవండి:
బిహార్ ఫైట్: ఎన్నికల నగారా మోగిందోచ్..
