మందుమాకూ లేని కరోనా మహమ్మారి సోకితే కోలుకోవడమనేది అదృష్టం మాత్రమే అంటారు. కానీ, గుండె నిబ్బరం, మనోధైర్యం ఉంటే కరోనాను సులభంగా జయించొచ్చు అంటారు బెంగళూరుకు చెందిన ఓ 'కరోనాజయుడు'.
అక్కడే సోకిందేమో...
బెంగళూరులో నమోదైన నాలుగో కేసు బాధితుడు ఆయన. అమెరికా నుంచి కర్ణాటకకు వచ్చిన ఆయన ఇంగ్లాండ్, హీత్రో విమానాశ్రయంలో కరోనా సోకి ఉండవచ్చని అనుమానం వ్యక్తం చేశారు. ఇటలీ, చైనా ప్రయాణికులు ఎంతో మంది అక్కడ రాకపోకలు జరుపుతుంటారు. కాబట్టి ఎయిర్పోర్ట్లోని టాయ్లెట్ లేదా సెక్యూరిటీ చెకింగ్ సమయంలో వైరస్ వ్యాపించి ఉండవచ్చన్నారు.
కర్ణాటక రాజీవ్ గాంధీ ఆసుపత్రి నుంచి కరోనాను జయించి డిశ్చార్జ్ అయిన మొదటి వ్యక్తి ఆయన. కరోనా సోకినప్పటి నుంచి వైరస్ నుంచి కోలుకునేవరకు తాను ఎదుర్కొన్న అనుభవాలను ఈటీవీ భారత్తో పంచుకున్నారు.
"నేను భారత్కు చేరుకునే సమయానికి నాలో కరోనా లక్షణాలు కనిపించాయి. ఇంట్లో వారికి, ఇతరులకు వైరస్ వ్యాపించకుండా చూడాలని నాకు తెలుసు. అందుకే నేను మా డూప్లెక్స్ ఇంటి మొదటి అంతస్తులోనే ఉన్నాను. నా బంధువులు, స్నేహితుల సాయంతో నేను రాజీవ్గాంధీ ఆసుపత్రికి వెళ్లాను. అక్కడ నన్ను నిర్బంధ వార్డులో ఉంచారు. వైద్యులు యాంటీబయాటిక్స్, టామీఫ్లూ వంటి మందులిస్తూ నాపట్ల జాగ్రత్తలు తీసుకున్నారు. కొన్ని సార్లు నాకు హోటల్ నుంచి తెప్పించిన భోజనం వడ్డించారు. మరికొన్ని సార్లు మా ఆఫీసు నుంచి పట్టుకొచ్చేవారు. డాక్టర్ రజినీ మనోధైర్యాన్నిచ్చారు. నన్ను వారు వీలైనంత ప్రశాంతంగా ఉండమన్నారు. అది నిజంగానే సత్ఫలితాలిచ్చింది."
-కరోనాజయుడు
ఆకలితోనే....
బాధితుడి ఆఫీసు నుంచి ఆసుపత్రికి భోజనం తీసుకొచ్చే యువకులు తమకు కరోనా సోకుతుందేమోనని భయపడేవారు. వారిని ఇబ్బంది పెట్టడం ఇష్టం లేక, చాలా సార్లు తనకు ఆకలిగా లేదని చెప్పి అలాగే పస్తు ఉండిపోయినట్లు తెలిపారు ఆ కరోనానుజయుడు.
ఇదీ చదవండి:మందు బాబులకు లిక్కర్ పాసులు- ప్రభుత్వం సంచలన నిర్ణయం
