సామాజిక మాధ్యమాల్లో వీడియో అప్లోడ్ చేసి 'బాబా కా దాబా'కు ప్రాచుర్యం కల్పించిన గౌరవ్ వాసన్పై ఆ హోటల్ యజమాని కాంతా ప్రసాద్ పోలీసులకు ఫిర్యాదు చేశారు. దాతలకు తన సొంత ఫోన్ నెంబర్ ఇచ్చి డబ్బులు వసూలు చేశారని, అయితే ఆ సొమ్మును తనకు బదిలీ చేయలేదని ఆరోపించారు.
"తన సొంత బ్యాంకు ఖాతాలతో పాటు కుటుంబ సభ్యుల ఖాతా వివరాలు, ఫోన్ నెంబర్లను మాత్రమే దాతలతో పంచుకున్నారు. ఉద్దేశపూర్వకంగా ఆయన ఇలా చేశారు. బ్యాంకు ఖాతాలు, వాలెట్లు తదితర మార్గాల ద్వారా భారీగా విరాళాలు సేకరించారు. దీనికి సంబంధించి నాకు ఎలాంటి సమాచారం ఇవ్వలేదు."
-కాంతా ప్రసాద్, బాబా కా దాబా యజమాని
కాంతా ప్రసాద్ ఇచ్చిన ఫిర్యాదును స్వీకరించినట్లు మాల్వీయ నగర్ పోలీసులు తెలిపారు. ఎఫ్ఐఆర్ ఇంకా నమోదు చేయలేదని చెప్పారు. దీనిపై విచారణ చేపడుతున్నట్లు వెల్లడించారు.
వీడియోతో వైరల్..
లాక్డౌన్తో తీవ్రంగా నష్టపోయిన వృద్ధ దంపతులను ఆదుకునేందుకు దిల్లీకి చెందిన గౌరవ్ వాసన్ అనే వ్యక్తి... ఓ వీడియో రూపొందించారు. వృద్ధుల పరిస్థితిని వివరించి వారికి సహాయం చేయాలని కోరుతూ.. వీడియోను సామాజిక మాధ్యమాల్లో అప్లోడ్ చేశారు. వీడియో ఒక్కసారిగా వైరల్ అయ్యింది. సామాజిక మాధ్యమాల్లో ట్రెండింగ్గా మారిపోయింది. దీంతో 'బాబా కా దాబా' హోటల్కు విశేష ప్రాచుర్యం లభించింది.
