ప్రధానమంత్రి పదవిపై ఆసక్తి చూపించే ప్రాంతీయ పార్టీల నేతలకు కాంగ్రెస్ కచ్చితంగా సహకరిస్తుందని ఆ పార్టీ సీనియర్ నేత గులామ్ నబీ ఆజాద్ స్పష్టం చేశారు. సార్వత్రిక ఎన్నికల్లో అతిపెద్ద పార్టీగా అవతరించినా మద్దతిస్తామని తెలిపారు. ప్రధాని పదవి కోసం కాంగ్రెస్ ప్రాకులడదన్నారు ఆజాద్.
"ఈ విషయంపై కాంగ్రెస్ ముందే స్పష్టతనిచ్చింది. అందరూ అంగీకరించి కాంగ్రెస్కు నాయకత్వ బాధ్యత అప్పగిస్తే... పార్టీ కచ్చితంగా స్వీకరిస్తుంది. ఎన్డీఏ ప్రభుత్వాన్ని గద్దెదింపడమే మా ప్రధాన లక్ష్యం. ఈ విషయంలో మద్దతిచ్చే పార్టీలతో కలిసి కాంగ్రెస్ ముందడుగు వేస్తుంది. అంతేకాని... మేము ప్రధాని అవ్వకపోతే, ఇంకెవ్వరూ అవ్వకూడదు అని పార్టీ నేతలు అనరు."
--- గులామ్ నబీ ఆజాద్, కాంగ్రెస్ నేత.
ఎన్డీయేతర ప్రభుత్వ స్థాపనలో కాంగ్రెస్ ముఖ్య పాత్ర పోషించే అవకాశముందన్న అంచనాల నేపథ్యంలో ఆజాద్ వ్యాఖ్యలకు ప్రాధాన్యత సంతరించుకుంది.
సాధారణ ఎన్నికల్లో హస్తం పార్టీ విజయం సాధించి... అతిపెద్ద పార్టీగా అవతరిస్తుందని ఆజాద్ ధీమా వ్యక్తం చేశారు.
మోదీది తుగ్లక్ పాలన...
ప్రధానమంత్రి నరేంద్ర మోదీ ఐదేళ్ల పాలనను 14వ శతాబ్దపు తుగ్లక్ పాలనతో పోల్చారు ఆజాద్. తుగ్లక్ లాగే మోదీ ఎన్నో వివాదాస్పద నిర్ణయాలు తీసుకుని దేశప్రజలను ఇబ్బందిపెట్టారని ఆరోపించారు. తన వ్యాఖ్యలకు నోట్లరద్దు, జీఎస్టీలే ఉదాహరణలన్నారు.
ఇదీ చూడండి: భారతీయులకు డొనాల్డ్ ట్రంప్ ప్రభుత్వం శుభవార్త
