అయోధ్యలో రామ మందిర నిర్మాణ పనులు వేగంగా సాగుతున్నాయి. ఈ క్రమంలో ఆలయం చుట్టూ ఉన్న 70 ఎకరాల ప్రాంగణాన్ని అభివృద్ధి చేయటం, భక్తులకు అసవరమైన సౌకర్యాల కల్పనకు ప్రజల నుంచి సూచనలు, సలహాలను కోరింది శ్రీ రామ జన్మభూమి తీర్థ క్షేత్ర ట్రస్ట్.
ఆలయ నిర్మాణ పురోగతిపై సమీక్షించేందుకు కొద్ది రోజుల క్రితం సమావేశమైంది ట్రస్ట్. ఈ సందర్భంగా పుష్కరణి, యాగ మండపం, అనుస్థాన్ మండపం, కల్యాణ మండపాల నిర్మాణం సహా రామజన్మోత్సవం, హనుమాన్ జయంతి, రామచర్చ, సీతా వివాహం వంటి ఉత్సవాల నిర్వహణపై ప్రజలు స్వచ్ఛందంగా తమ సలహాలు, నిర్మాణాల డిజైన్ల నమూనాలు అందించాలని కోరింది. ఈ నిర్మాణ ఆకృతుల నమూనాలు భారతీయ వాస్తుశాస్త్రం లేదా స్థాపత్య వేదం ఆధారంగా ఉండాలని సూచించారు.
రోజుకు 5 లక్షల మంది భక్తులు..
ఆలయ ప్రాంగణంలోనే గురుకుల పాఠశాల, 51 మంది విద్యార్థులు, అధ్యాపకులు ఉండేలా నివాస గృహాలకు సైతం డిజైన్లు సూచించాలని కోరింది ట్రస్ట్. నాల్నీల్ తిలా, సీతాకి రాసోయి, కుబెర్ తిలా, అంగద్ తిలా వంటి చారిత్రాత్మక ప్రదేశాల్లో నిర్మాణాలు ప్రధాన ఆలయంతో అనుసంధానమయ్యేలా ఆకృతులు ఉండాలని సూచించింది. అలాగే.. శ్రీరాముడిని దర్శించుకునేందుకు 1లక్ష నుంచి 5లక్షల మంది వచ్చే అవకాశం ఉందని అంచనా వేసిన ట్రస్ట్.. వారికి అసరమైన సౌకర్యాల కల్పనకూ నిర్మాణాల డిజైన్ల నమూనాలను కోరింది.
లైబ్రరీ, మ్యూజియం..
శ్రీరామ డిజిటల్ లైబ్రరీ, పరిశోధన కేంద్రంతో పాటు మ్యూజియం, 5వేల మంది వరకు కూర్చునేలా ఆడిటోరియం నిర్మాణానికి డిజైన్లు సూచించాలని కోరింది ట్రస్ట్. రామకథను మంచి ఆడియో విజ్యువల్ ఎఫెక్ట్స్తో తిలకించేలా మినీ థియోటర్, అయోథ్య చుట్టు పక్కల ప్రాంతాలను అభివృద్ధి చేయడానికి సలహాలు ఇవ్వాలని సూచించింది. వీఐపీలు, పూజారులు ఉండేలా అతిథిగృహాలు, ఓ గోశాలను నిర్మించాలని ప్రణాళిక చేస్తోంది ట్రస్ట్.
రామ మందిర నిర్మాణానికి ఆగస్టు 5న భూమిపూజ చేశారు ప్రధానమంత్రి నరేంద్ర మోదీ. అనంతరం ఆలయ నిర్మాణ పనులు ప్రారంభమయ్యాయని, ఇంజినీర్లు ఆలయ ప్రాంతంలోని మట్టిని పరీక్షిస్తున్నారని ఆగస్టు 20న తెలిపింది ట్రస్ట్.
ఇదీ చూడండి: 'అయోధ్య గుడి నిర్మాణాన్ని కళ్లారా చూడొచ్చు!'
