భారత మాజీ క్రికెటర్, తూర్పు దిల్లీ భాజపా అభ్యర్థి గౌతమ్ గంభీర్కు వ్యతిరేకంగా ఈసీకి లేఖ రాశారు ఆప్ నేత అటిషి మర్లేనా. 72 గంటల పాటు ఎన్నికల ప్రచారానికి దూరంగా ఉంచాలని లేఖలో కోరారు. ఎన్నికల ప్రవర్తనా నియమావళిని గత మూడు రోజుల్లోనే గంభీర్ రెండు సార్లు ఉల్లంఘించారని ఆరోపించారు.
శనివారం రోజు జాంగ్పురాలో అనుమతి తీసుకోకుండా బహిరంగ సభ నిర్వహించినందుకు గంభీర్పై ఎఫ్ఐఆర్ నమోదైంది.
''మొదటి ఉల్లంఘన కింద గంభీర్పై ఎన్నికల సంఘం ఎఫ్ఐఆర్ నమోదు చేయాలని ఆదేశించింది. అయినా ఎలాంటి మార్పు లేదు. ఆయన అదే పునరావృతం చేస్తున్నారు. ఈసీని పట్టించుకోట్లేదు. నిబంధనలు ఉల్లంఘిస్తున్నందున గంభీర్పై ఎఫ్ఐఆర్ నమోదు చేయాలని కోరుతున్నా. 72 గంటల పాటు ప్రచారానికి దూరంగా ఉంచాలి.''
- ఈసీకి లేఖలో అటిషి మర్లేనా, తూర్పు దిల్లీ ఆప్ అభ్యర్థి
అయితే చివర్లో.. ' మీరు నా ఫిర్యాదుపై త్వరగా చర్య తీసుకోలేరని తెలుసు. కానీ.. ఎన్నికల ప్రవర్తనా నియమావళి ఉల్లంఘించే ప్రతి ఒక్కరిపై సరైన చర్యలు తీసుకోండి.' అని పేర్కొన్నారు ఆప్ నేత.
ఈసీకి లేఖ రాయడానికి ముందు అటిషి మర్లేనా.. భాజపా అభ్యర్థిపై వరుస ట్వీట్లతో విరుచుకుపడ్డారు. నియోజకవర్గంలో ఎలాంటి అభివృద్ధి పనులు చేయడానికి భాజపా టికెట్ తీసుకున్నారు అని నిలదీశారు.
సార్వత్రిక ఎన్నికల ఆరో విడతలో భాగంగా దిల్లీలో మే 12న పోలింగ్ జరగనుంది.
