రాజస్థాన్ రాజకీయ సంక్షోభం మరింత ముదిరింది. రెబల్ నేత సచిన్ పైలట్పై కాంగ్రెస్ వేటు వేయడం వల్ల రాష్ట్ర రాజకీయాలు కీలక మలుపు తిరిగాయి. సచిన్ను పార్టీ పదవుల నుంచి తప్పించిన కొద్ది సేపటికే.. గవర్నర్ కల్రాజ్ మిశ్రాతో భేటీ అయ్యారు ముఖ్యమంత్రి అశోక్ గహ్లోత్. సచిన్ను డిప్యూటీ సీఎం పదవి నుంచి తొలగించాలని ప్రతిపాదించారు గహ్లోత్. ఈ ప్రతిపాదనను గవర్నర్ వెంటనే ఆమోదించారు.
అనంతరం మీడియాతో మాట్లాడిన గహ్లోత్.. భాజపాపై తీవ్ర స్థాయిలో మండిపడ్డారు. సచిన్.. భాజపా చేతుల్లోకి వెళ్లిపోయారని విమర్శించారు. మధ్యప్రదేశ్లో ప్రభుత్వాన్ని కూల్చిన విధంగానే రాజస్థాన్లోనూ భాజపా కుట్ర పన్నిందని ఆరోపించారు.
"నిజానికి పైలట్ చేతిలో కూడా ఏమీ లేదు. ఇదంతా భాజపా పన్నిన కుట్ర. పైలట్ భాజపా చేతుల్లోకి వెళ్లిపోయారు. రిసార్టులను ఏర్పాటు చేసింది భాజపానే. కాంగ్రెస్ ఎమ్మెల్యేలతో బేరసారాలకు పాల్పడుతోంది. దేశ చరిత్రలోనే తొలిసారిగా ప్రజాస్వామ్యం ప్రమాదంలో పడింది."
--- అశోక్ గహ్లోత్, రాజస్థాన్ ముఖ్యమంత్రి.
సచిన్ పైలట్తో పాటు ఆయన అనుచరులకు కాంగ్రెస్ అనేక అవకాశాలు ఇచ్చిందని తెలిపారు గహ్లోత్. అయినప్పటికీ పైలట్ రెబల్గా మారడం దురదృష్టకరమని అభిప్రాయపడ్డారు.
సచిన్తో పాటు ఆయన మద్దతుదారులు విశ్వేంద్ర సింగ్, రమేశ్ మీనాను కూడా మంత్రి పదవుల నుంచి తప్పించింది కాంగ్రెస్.
'అవన్నీ తప్పుడు ఆరోపణలు...'
రాజస్థాన్ సంక్షోభం వెనక తమ హస్తం ఉందన్న కాంగ్రెస్ ఆరోపణలను భాజపా ఖండించింది. పార్టీ సంక్షోభంతో తమకు ఎలాంటి సంబంధం లేదని భాజపా రాజస్థాన్ ఇన్ఛార్జ్ అవినాశ్ రాయ్ ఖన్నా స్పష్టం చేశారు.
భాజపా వ్యూహమేంటి?
ఈ వ్యవహారంపై భాజపా ఆచితూచి అడుగులు వేస్తున్నట్టు కనపడుతోంది. రాష్ట్రంలో నెలకొన్న తాజా పరిణామాలపై చర్చించేందుకు జైపుర్ వేదికగా భాజపా నేతలు సమావేశమయ్యారు.
అయితే ప్రస్తుతానికి బలపరీక్ష డిమాండ్ చేయడం లేదని భాజపా రాష్ట్ర అధ్యక్షుడు సతీశ్ పూనియా వెల్లడించారు.
"ప్రస్తుతానికి మేము బలపరీక్ష జరపాలని డిమాండ్ చేయడం లేదు. ఇదొక అవినీతి ప్రభుత్వం. కరోనా సంక్షోభాన్ని ఎదుర్కొనడంలోనూ విఫలమైంది. ప్రభుత్వం బలహీనపడింది. ప్రజల సంక్షేమాన్ని దృష్టిలో పెట్టుకుని.. ఈ ప్రభుత్వం తప్పుకోవాలి."
--- సతీశ్ పూనియా, భాజపా రాజస్థాన్ అధ్యక్షుడు.
తమ నేతలందరూ ఐకమత్యంతో ఉంటారని కాంగ్రెస్ ఎప్పుడూ చెబుతుందని.. అయితే పైలట్ వ్యవహారంతో అది ఎంత నిజమో అందరికీ తెలిసిందని ఎద్దేవా చేశారు పూనియా.
తనను పార్టీ నుంచి తప్పించడంపై సచిన్ పైలట్ స్పందించారు. నిజాన్ని ఓడించలేరంటూ ట్వీట్ చేశారు. ఈ నేపథ్యంలో పైలట్ తదుపరి కార్యాచరణ ఏంటి? భాజపాలో చేరతారా? లేదా? అన్న విషయాలపై సర్వత్రా ఉత్కంఠ నెలకొంది.
ఇదీ చూడండి:- గహ్లోత్ నాయకత్వానికే మా పూర్తి మద్దతు: సీఎల్పీ
