'పౌర' నిరసనలపై సైన్యాధిపతి బిపిన్ రావత్ చేసిన వ్యాఖ్యలపై తీవ్ర దుమారం చెలరేగింది. రాజకీయాలపై భారత సైన్యాధిపతి వ్యాఖ్యానించడం సరికాదని కాంగ్రెస్ సహా అనేక విపక్ష పార్టీలు మండిపడ్డాయి.
మారణహోమాలకు తమ అనుచరులను రెచ్చగొట్టడమూ నాయకత్వ లక్షణాలు కాదని దిగ్విజయ్ సింగ్ ఎద్దేవా చేశారు.
‘"బిపిన్ రావత్.. నేను మీతో ఏకీభవిస్తున్నాను. అయితే మత కల్లోలాలు, మారణహోమాలకు తమ అనుచరులను రెచ్చగొట్టే వాళ్లు కూడా నాయకులు కాదు. మరి మీరు కూడా నాతో ఏకీభవిస్తారా జనరల్ సాహెబ్?"
-దిగ్విజయ్ సింగ్, కాంగ్రెస్ నేత.
అంతకుముందు.. ప్రజలు, విద్యార్థులను హింసకు ఉసిగొల్పడం నాయకత్వం కాదని భారత సైన్యాధిపతి బిపిన్ రావత్ ఉద్ఘాటించారు. నిజమైన నాయకుడు ప్రజలను సరైన మార్గంలో నడిపిస్తాడని వ్యాఖ్యనించారు. దిల్లీ పౌర అలర్ల నేపథ్యంలో రావత్ ఈ వ్యాఖ్యలు చేశారు.
సైన్యాధిపతి వ్యాఖ్యలు రాజ్యాంగ విరుద్ధమని మరో కాంగ్రెస్ నేత బ్రిజేశ్ కాలప్ప ఆరోపించారు.
"పౌర నిరసనలకు వ్యతిరేకంగా సైన్యాధిపతి మాట్లాడటం పూర్తిగా రాజ్యాంగ విరుద్ధం. ఈరోజు రాజకీయ సమస్యలపై మాట్లాడటానికి సైన్యాధికారికి అవకాశమిస్తే, రేపు ఏకంగా సైన్యాన్నే స్వాధీనం చేసుకునే అవకాశముంది."
-బ్రిజేశ్ కాలప్ప, కాంగ్రెస్ ప్రతినిధి.
మోదీ ప్రభుత్వ విధానాలను రావత్ వ్యాఖ్యలు బలహీనం చేస్తున్నాయని ఎంఐఎం చీఫ్ అసదుద్దీన్ ఒవైసీ తెలిపారు.
"బిపిన్ రావత్ వ్యాఖ్యలు ప్రధానమంత్రి నరేంద్ర మోదీ ప్రభుత్వ విధానాల్ని బలహీనం చేస్తున్నాయని తెలుస్తోంది. అత్యయిక పరిస్థితి సమయంలో దేశంలో చెలరేగిన నిరసనల్లో మోదీ పాల్గొన్నారని.. ఆ విషయాన్ని స్వయంగా మోదీనే అంగీకరించారు. ఇప్పుడు సైన్యాధిపతి వ్యాఖ్యల ప్రకారం మోదీ చేసింది కూడా తప్పేకదా."
-అసదుద్దీన్ ఒవైసీ, ఎంఐఎం చీఫ్.
రావత్ రాజకీయాలపై వ్యాఖ్యనించడం తగదని.. దేశానికి ఆయన క్షమాపణలు తెలపాలని సీపీఐ(ఎమ్) డిమాండ్ చేసింది.
"మోదీ ప్రభుత్వంలో పరిస్థితి ఎలా క్షీణించిందో బిపిన్ రావత్ వ్యాఖ్యల ద్వారా తెలుస్తోంది. ఉన్నతాధికారై తన సంస్థాగత పరిమితులను ఉల్లంఘించారు. పాకిస్థాన్ సైన్యం ఆధిపత్యంలో ఆ దేశ రాజకీయం నడుస్తోంది. బహుశా మనం అదే దారిలో వెళ్తున్నామా అనే ప్రశ్న తలెత్తుతోంది. ప్రజాస్వామ్య పోరాటాల్లో ఓ సైన్యాధికారి జోక్యం చేసుకోవడం భారత్ చరిత్రలో ఇప్పటిదాకా చూడలేదు. రావత్ క్షమాపణలు చెప్పాలి."
-సీపీఐ(ఎమ్).
ఇదీ చూడండి : 'ప్రజలను హింసకు ఉసిగొల్పడం నాయకత్వం కాదు'
