భారత్, మయన్మార్ సైన్యాలు సంయుక్తంగా తమ సరిహద్దు ప్రాంతాల్లోని ఉగ్రస్థావరాలపై భారీ ఆపరేషన్ చేపట్టాయి. మణిపుర్, నాగాలాండ్, అసోంలోని ముష్కర స్థావరాలను ధ్వంసం చేశాయి. గత నెల 16 నుంచి మూడు వారాల పాటు ఆపరేషన్ జరిగిందని రక్షణ అధికారులు వెల్లడించారు.
భారత్-మయన్మార్ మధ్య 1,645 కి.మీ సరిహద్దు ఉంది. తీవ్రవాదం ఎక్కువగా ఉండే మణిపుర్, నాగాలాండ్ సహా పలు ఈశాన్య రాష్ట్రాలతో మయన్మార్ సరిహద్దు పంచుకుంటోంది.
ఆపరేషన్ సన్రైజ్-1
ముష్కరుల ఆట కట్టించేందుకు ఇరుదేశాల సైన్యాలు మూడు నెలల కిందట 'ఆపరేషన్ సన్రైజ్' పేరుతో దాడులు నిర్వహించాయి. పలు తీవ్రవాద స్థావరాలను నేలమట్టం చేశాయి.
కాలాదాన్ రవాణా ప్రాజెక్టును వ్యతిరేకించే అరాకన్ ఆర్మీ అనే వేర్పాటువాద ముఠాను లక్ష్యంగా చేసుకుని భారత సైన్యం ఈ ఆపరేషన్ చేపట్టింది.
ఆపరేషన్ సన్రైజ్-2
గత నెలలో చేపట్టిన ఆపరేషన్ సన్రైజ్-2లో ఇరుదేశాల సైన్యాలు కలిసి కేఎల్ఓ, ఎన్ఎస్సీఎన్ (ఖాప్లాంగ్), ఉల్ఫా (ఐ), ఎన్డీఎఫ్బీ తదితర తీవ్రవాద ముఠాల స్థావరాలను ధ్వంసం చేశాయి. సుమారు 75 మంది మిలిటెంట్లను నిర్బంధంలోకి తీసుకున్నాయి.
క్షేత్రస్థాయి పరిస్థితులు, నిఘా సమాచారం ఆధారంగా మరో విడత ఆపరేషన్ నిర్వహించే అవకాశం ఉందని అధికార వర్గాలు తెలిపాయి.
ఇదీ చూడండి: సంక్షోభం: నీళ్లు లేవు... భోజనం పెట్టలేం..!
