ముఖ్యమంత్రి మనోహర్ పారికర్ మృతితో గోవాలో రాజకీయం ఉత్కంఠగా మారింది. గవర్నర్ మృదుల సిన్హాను 14 మంది కాంగ్రెస్ ఎమ్మెల్యేలు కలిశారు. ప్రభుత్వ ఏర్పాటుకు అవకాశం కల్పించాలని కోరారు.
"మేము గవర్నర్ను కలిశాము. రాష్ట్రంలో అతిపెద్ద పార్టీ కాంగ్రెస్. ప్రభుత్వ ఏర్పాటుకు అవకాశం ఇవ్వాలని కోరాం. మా వద్ద 14 మంది ఎమ్మెల్యేలు ఉన్నారు. మేము మెజారిటీ నిరుపించుకుంటామని గవర్నర్కు స్పష్టం చేశాం."
---- చంద్రకాంత్ కావ్లేకర్, ప్రతిపక్ష నేత
సీఎల్పీ సమావేశంలో నిర్ణయం
సోమవారం ఉదయం పనాజీలో సీఎల్పీ సమావేశం నిర్వహించారు. గవర్నర్ అపాయింట్మెంట్ ఇవ్వనప్పటికీ కాంగ్రెస్ ఎమ్మెల్యేలు రాజ్భవన్కు వెళ్లడానికి నిర్ణయించామని ప్రతిపక్ష నాయకుడు చంద్రకాంత్ కవ్లేకర్ తెలిపారు. గత శుక్రవారమే గవర్నర్ సిన్హాకు ప్రభుత్వ ఏర్పాటుపై లేఖ రాసింది ప్రతిపక్ష పార్టీ. ఇదే విషయమై ఆదివారమూ లేఖ రాసింది కాంగ్రెస్.
అతిపెద్ద పార్టీగా కాంగ్రెస్
ప్రస్తుతం 14 మంది ఎమ్మెల్యేలతో కాంగ్రెస్ అతిపెద్ద పార్టీగా ఉంది. భాజపాకు 12 మంది ఎమ్మెల్యేలు ఉన్నారు. 40 మంది సభ్యుల అసెంబ్లీలో ప్రస్తుతం 36 మంది మాత్రమే ఉన్నారు. పారికర్ ఆదివారం కన్నుమూశారు. భాజపా ఎమ్మెల్యే ఫ్రాన్సిస్ జీ సౌజ ఇటీవలే మరణించారు. మరో ఇద్దరు కాంగ్రెస్ ఎమ్మెల్యేలు రాజీనామా చేశారు. అసెంబ్లీలో జీఎఫ్పీ, ఎంజీపీ పార్టీలు తలో మూడు సీట్లు ఉన్నాయి. ఎన్సీపీకి ఒక సీటు ఉంది.
ఇదీ చూడండీ:గంటలో గోవా సీఎం ఎంపిక: భాజపా
