ఉత్తర భారతంలో జాతీయ ఆరోగ్య అత్యవసర పరిస్థితిని ప్రకటించాల్సిందిగా ప్రధాని మోదీకి విజ్ఞప్తి చేశాయి పలు వాతావరణ పరిరక్షణ సంస్థలు. బంగాల్ నుంచి పంజాబ్ వరకు రెండు-మూడు రోజులుగా కాలుష్యం ప్రమాదకర స్థాయికి చేరిందని వెల్లడించాయి. ఉష్ణోగ్రతలు తగ్గడం, పరిశ్రమల నుంచి విడుదలయ్యే విషవాయువుల తీవ్రత మరింత పెరిగినందున ప్రధానితో పాటు ఆయా రాష్ట్ర ప్రభుత్వాలను హెచ్చరించాయి.
పర్యావరణ పరిరక్షణ కోసం ఉద్యమించే కేర్ ఫర్ ఎయిర్, మై రైట్ టు బ్రీత్, చింతన్ వంటి సంస్థలు "ద క్లీన్ ఎయిర్ కలెక్టివ్" పేరిట ఒకే గొడుగు కిందకు వచ్చి మోదీకి ఈ విజ్ఞప్తి చేశాయి.
'ఉత్తరాదిన దయచేసి జాతీయ ఆరోగ్య అత్యవసర పరిస్థితిని అమలు చేయాల్సిందిగా ప్రధానమంత్రి సహా అన్ని రాష్ట్రాల ముఖ్యమంత్రులనూ కోరుతున్నాం. వ్యర్థాలు, బయోమాస్ దహనంపై ఇప్పటికే ఉన్న చట్టాలను కచ్చితంగా అమలు చేయండి. కాలుష్య కారకాలను నియంత్రించడంపై దృష్టి సారించాల్సిన అవసరముంది.'
-ద క్లీన్ ఎయిర్ కలెక్టివ్
సగటు పౌరుడికి ఇబ్బంది
ఉత్తరాది ప్రాంతమంతా హానికర వాయు నిలయంగా మారిందన్నారు 'ద క్లీన్ ఎయిర్ కలెక్టివ్' సభ్యులు. ఇంత తీవ్రమైన కాలుష్యం.. సగటు పౌరుడి ఊపిరి పీల్చుకునే హక్కుకు భంగం కలిగిస్తోందని ఆవేదన వ్యక్తంచేశారు.
ఇదీ చదవండి:'పౌర' ఆగ్రహం: ఈశాన్యంలో నిరసనలు హింసాత్మకం
