కరోనా మహమ్మారికి దేశవ్యాప్తంగా ఉన్న ప్రధాన నగరాలు బెంబేలెత్తుతున్నాయి. ఇరుకు ఇళ్లల్లో ఉంటూ.. ఎటువైపు నుంచి వైరస్ వచ్చిపడుతుందోనని బిక్కుబిక్కమంటూ జీవిస్తున్నారు నగరవాసులు. అనేక చోట్ల భౌతిక దూరం పాటించడం చాలా కష్టంగా మారింది. అయితే ఛత్తీస్గఢ్లోని బస్తర్ జిల్లాకు చెందిన ఓ గిరిజన బృందం.. తరతరాలుగా భౌతిక దూరాన్ని సంప్రదాయంగా మార్చుకుని జీవనం సాగిస్తోంది.
సంప్రదాయమే ముఖ్యం...
ఛత్తీస్గఢ్లో అత్యంత సున్నితమైన గిరిజనుల బృందాల్లో అభుజ్మారియా ఒకటి. ఆసుపత్రులకు అనేక కిలోమీటర్ల దూరంలో..దరిద్రానికి అతి సమీపంలో జీవనం సాగిస్తున్నారు ఈ గిరిజనలు. ఇలాంటి పరిస్థితుల్లో కరోనా మహమ్మారి వీరిని తాకితే.. ఆ మొత్తం గిరిజన జాతే ప్రమాదంలో పడే అవకాశముంది. కానీ ఎన్నో ఏళ్లుగా వీరు పాటించే ఓ సంప్రదాయం.. ఇప్పుడు వీరిని కాపాడుతోంది. దేశాన్ని వీరివైపు చూసేలా చేసింది ఆ సంప్రదాయం.
అభుజ్మారియా గిరిజనుల సంప్రదాయం ప్రకారం.. కుటుంబసభ్యుల్లో ఎవరి ఇళ్లు వారికి ఉంటాయి. భర్త, భార్య, కొడుకు, పిల్లలు... ఎవరైనా సరే వేరువేరుగా ఉండాల్సిందే. వేరువేరుగా వంట చేసుకోవాల్సిందే.
"నాకు ముగ్గురు మనవళ్లు ఉన్నారు. వారి ముగ్గురికీ మూడు ఇళ్లు కట్టి ఇచ్చాం. ఈ సంప్రదాయాన్ని తరతరాలుగా పాటిస్తున్నాం."
--- అభుజ్మారియా మహిళ.
భౌతిక దూరాన్ని సంప్రదాయంగా చేసుకుని ఎన్నో ఏళ్లుగా జీవిస్తున్నప్పటికీ... వీరికి వైరస్ సోకకుండా ఛత్తీస్గఢ్ ప్రభుత్వం తగిన చర్యలు చేపట్టింది. నగరాల నుంచి వచ్చిన వారు మార్కెట్లు పెట్టుకునే 'హాట్ బజార్'ను రద్దు చేసింది. ఆశా వర్కర్లను రంగంలోకి దింపి.. శానిటైజేషన్ వంటి పరిశుభ్రత చర్యలపై గిరిజనులకు అవగాహన కల్పిస్తోంది.
