మహారాష్ట్రలో సీఎం పీఠాన్ని దక్కించుకున్న శివసేన ఇప్పుడు తన దృష్టిని గోవాకు మళ్లించింది. అక్కడ అధికారంలో ఉన్న భాజపా కూటమికి వ్యతిరేకంగా పావులు కదుపుతోంది. గోవాలో భాజపాను వ్యతిరేకించే పార్టీలతో మరో కూటమిని ఏర్పాటు చేయబోతున్నట్లు శివసేన అధికార ప్రతినిధి సంజయ్రౌత్ శుక్రవారం ప్రకటించారు.
గోవా ఫార్వర్డ్ పార్టీ(జీఎఫ్పీ) నాయకుడు విజయ్ సర్దేశాయి శుక్రవారం ముంబయిలో రౌత్ను కలిసి శివసేనకు మద్దతుగా మాట్లాడారు. మహారాష్ట్రవాదీ గోమంతక్ పార్టీ(ఎంజీపీ)కి చెందిన సుదిన్ ధావలికార్ కూడా భాజపా వ్యతిరేక కూటమి ఏర్పాటు సాధ్యమేనన్నారు.
''గోవాలో కచ్చితంగా భూకంపం పుడుతుంది. సర్దేశాయి తన ఎమ్మెల్యేలతో ఇక్కడ ఉన్నారు. భాజపాకు మద్దతిచ్చిన ఇతర ఎమ్మెల్యేలూ మాతో టచ్లో ఉన్నారు.''
- సంజయ్ రౌత్, శివసేన అధికార ప్రతినిధి
2022లో గోవా శాసనసభకు జరిగే ఎన్నికల్లో శివసేన, కాంగ్రెస్, ఎంజీపీ, జీఎఫ్పీ, ఎన్సీపీ కలిసి పోటీచేసే అవకాశాలున్నాయని వినిపిస్తోంది. 40 మంది శాసనసభ్యులున్న గోవా శాసనసభలో భాజపాకు ప్రస్తుతం 27 మంది ఎమ్మెల్యేలు ఉన్నారు.
పొత్తుపై ఆసక్తి లేదు: కాంగ్రెస్
గోవాలో ప్రతిపక్ష పార్టీలతో కూటమి ఏర్పాటు చేయనున్నట్లు.. సంజయ్రౌత్ ప్రకటించిన నేపథ్యంలో రాష్ట్ర కాంగ్రెస్ అంశంపై స్పందించింది. ప్రభుత్వాన్ని పడగొట్టేందుకు అధికార పార్టీ ఎమ్మెల్యేలను ఆకర్షించే ప్రయత్నాలు చేయబోమని తెలిపారు గోవా కాంగ్రెస్ అధ్యక్షుడు గిరీశ్ ఛోడాంకర్. ఇంతకంటే ప్రతిపక్షంలో ఉండటానికే ప్రాధాన్యం చూపిస్తామని స్పష్టం చేశారు.
