లోక్సభకు పోటీ చేసే 184 అభ్యర్థులతో భాజపా తొలి జాబితాను విడుదల చేసింది. పార్టీ కురువృద్ధుడు లాల్ కృష్ణ అడ్వాణీ అడ్డా నుంచి భాజపా జాతీయ అధ్యక్షుడు అమిత్ షా పోటీ చేయనున్నారు. దీనిపై అడ్వాణీ మౌనం వహిస్తుండటం పలు అనుమానాలకు తావిస్తోంది. 90 ఏళ్లు పైబడిన వయసులో వేరే స్థానం నుంచైనా పోటీ చేస్తారా లేదా అన్నది ప్రాధాన్యం సంతరించుకుంది.
గాంధీనగర్ లోక్సభ స్థానం నుంచి ఆరు సార్లు గెలిచారు అడ్వాణీ. మొదటి సారిగా 1991లో ఇక్కడ నుంచి విజయం సాధించారు. భాజపాకు వరుసగా విజయాలు అందించిన స్థానాన్ని అమిత్ షాకు కట్టబెడతారని ముందునుంచే ఊహాగానాలు సాగుతున్నాయి. అమిత్ షానే ఇక్కడి నుంచి పోటీ చేయాలని గాంధీనగర్ పరిధిలోని వెజల్పూర్ ఎమ్మెల్యే కిశోర్ చౌహాన్ స్పష్టంగా చెప్పారు.
కొన్ని రోజుల ముందు అడ్వాణీ వ్యక్తిగత కార్యదర్శి మాట్లాడుతూ ఆయనేమీ నిర్ణయించుకోలేదని తెలిపారు. పార్టీ కోరితే ఆలోచిస్తారని తెలిపారు. ప్రస్తుత పరిస్థితుల్లో అడ్వాణీని పక్కనబెట్టినట్లేనని ఊహాగానాలు వినిపిస్తున్నాయి. అడ్వాణీని బలవంతంగా తొలగిస్తున్నారని కాంగ్రెస్ పార్టీ ఆరోపణలు చేసింది.
"మొదట అడ్వాణీని మార్గదర్శక మండలికి బలవంతంగా పంపారు. ఇప్పడు ఆయన పార్లమెంట్ స్థానాన్ని లాక్కున్నారు. పెద్దల్ని గౌరవించటం మోదీకి తెలియదు. ఇక ఆయన ఎందుకు ప్రజల నమ్మకానికి గౌరవమిస్తారు? భాజపాను తరిమేయండి. దేశాన్ని కాపాడండి."
-రణ్దీప్ సింగ్ సుర్జేవాలా, కాంగ్రెస్ అధికార ప్రతినిధి.
ఇదీ చూడండి: భారత్ భేరి: అగ్రనేత అంతరంగం ఏంటి...?
