ఇటీవల ముగిసిన లోక్సభ ఎన్నికల్లో తిరుగులేని విజయం సాధించిన ఎన్డీఏ కూటమి ఆధ్వర్యంలో ప్రభుత్వ ఏర్పాటు ప్రక్రియకు సర్వం సిద్ధమైంది. రెండోసారి భారత ప్రధానమంత్రిగా నరేంద్ర మోదీ నేడు ప్రమాణస్వీకారం చేయనున్నారు.
దిల్లీలోని రాష్ట్రపతి భవన్ ఎదుట బహిరంగ స్థలంలో అంగరంగ వైభవంగా కార్యక్రమం జరగనుంది. ప్రపంచ దేశాధినేతలు, అన్ని రాష్ట్రాల ప్రముఖులు, పార్టీ గెలుపు కోసం కృషి చేసిన భాజపా కార్యకర్తల కుటుంబాల సమక్షంలో ఘనంగా జరగనుందీ వేడుక. రాత్రి 7 గంటలకు జరగనున్న కార్యక్రమంలో నరేంద్ర మోదీతో పాటు పలువురు మంత్రులు ప్రమాణ స్వీకారం చేయనున్నారు. రాష్ట్రపతి రామ్నాథ్ కోవింద్ మోదీతో ప్రమాణం చేయించనున్నారు.
మంత్రివర్గంలో ఎవరెవరు...?
మంత్రి వర్గంలో ఎవరెవరు ఉంటారనేది ఆసక్తి రేకెత్తిస్తోంది. కూర్పుపై పార్టీ జాతీయాధ్యక్షుడు అమిత్షాతో సుదీర్ఘంగా చర్చలు జరిపారు మోదీ. కేంద్ర ప్రభుత్వంలో కీలకం కాగలరని భావిస్తున్న షాకు ఏ మంత్రిత్వ శాఖ దక్కుతుందోనని ఉత్కంఠ నెలకొంది.
సార్వత్రిక ఎన్నికల్లో ఎన్డీఏ కూటమి 353 స్థానాల్లో విజయదుందుభి మోగించింది. భాజపానే స్వయంగా 303 సీట్లు నెగ్గి పూర్తి మెజార్టీ సాధించింది. కాంగ్రెస్ 52 స్థానాలకే పరిమితమైంది.
8 వేల మందికి పైగా అతిథులు...
ప్రమాణ స్వీకార మహోత్సవాన్ని ఘనంగా నిర్వహించాలని భావించిన భాజపా.. వేల మందికి ఆహ్వానాలు పంపింది. కార్యక్రమానికి దాదాపు 8 వేల మంది అతిథులు హాజరుకానున్నట్లు సమాచారం. రాష్ట్రపతి భవన్లో ఇప్పటివరకు ఇదే అతిపెద్ద కార్యక్రమం అని పేర్కొన్నారు రాష్ట్రపతి భవన్ ప్రతినిధి అశోక్ మాలిక్.
బిమ్స్టెక్ దేశాధినేతల హాజరు...
మోదీ ప్రమాణ స్వీకారానికి ఈ సారి బిమ్స్టెక్ దేశాలతో పాటు మారిషస్, కిరిగిస్థాన్ అధినేతలకు ఆహ్వానాలు పంపారు. బిమ్స్టెక్ దేశాల్లో భారత్, బంగ్లాదేశ్, మయన్మార్, శ్రీలంక, థాయిలాండ్, భూటాన్ దేశాలు భాగస్వాములుగా ఉన్నాయి. 2014లో మోదీ పదవిని స్వీకరించేటప్పుడు సార్క్ దేశాల ప్రతినిధులు హాజరయ్యారు. అందులో పాకిస్థాన్ అప్పటి ప్రధాని నవాజ్ షరీఫ్ కూడా ఉన్నారు.
వివిధ రాష్ట్రాల ముఖ్యమంత్రులు, యూపీఏ ఛైర్పర్సన్ సోనియాగాంధీ, కాంగ్రెస్ అధ్యక్షుడు రాహుల్ గాంధీ, మాజీ ప్రధాని మన్మోహన్ సింగ్, తెలుగు రాష్ట్రాల నుంచి కేసీఆర్, జగన్, ఇతర రాష్ట్రాల ముఖ్యమంత్రులు, ఇతర ప్రముఖులు హాజరుకానున్నారు.
వంటల ఘుమఘుమలు...
ప్రమాణస్వీకారం అనంతరం రాష్ట్రపతి రామ్నాథ్ కోవింద్ ఆతిథ్యం ఇవ్వనున్న విందు కోసం ప్రత్యేక వంటకాలు సిద్ధం చేస్తున్నారు. 'దాల్ రైసినా'ను విదేశాల నుంచి వచ్చే ప్రతినిధుల కోసం ప్రత్యేకంగా వడ్డించనున్నారు.
భాజపా ఎంపీలంతా మొదట దిల్లీలోని మహాత్మాగాంధీ, వాజ్పేయీ సమాధుల వద్ద నివాళులర్పించనున్నారు. ప్రధానితో పాటు ఎంపీలంతా ఈ కార్యక్రమంలో తప్పక పాల్గొనాలని భాజపా ఓ ప్రకటన విడుదల చేసింది. మంత్రివర్గం కూర్పుపైనా సుదీర్ఘ చర్చలు జరిగాయి. నూతన మంత్రి వర్గంలో ఎవరెవరికి చోటు దక్కుతుందనేది ప్రమాణ స్వీకారం సమయంలో స్పష్టం కానుంది.
ఇదీ చూడండి:
