భాజపా X ఆప్: 'నిర్భయ' జాప్యంపై మాటల యుద్ధం

నిర్భయ దోషుల ఉరి శిక్ష అమలు ఆలస్యం కావడానికి దిల్లీ ప్రభుత్వ విధానాలే కారణమని కేంద్రమంత్రి ప్రకాశ్ జావడేకర్ ఆరోపించారు. భాజపా విమర్శలను ఆప్​ తిప్పికొట్టింది. శాంతిభద్రతలు కేంద్రం చేతిలో ఉంటాయని... కాషాయ పార్టీ ప్రజలను తప్పుదోవ పట్టిస్తోందని ఎదురుదాడి చేసింది.

నిర్భయ దోషుల మరణశిక్ష అమలులో జాప్యంపై భాజపా, ఆమ్​ఆద్మీ మధ్య మాటల యుద్ధం నడుస్తోంది. ఆలస్యానికి కారణం మీదంటే మీదని ఇరు పార్టీలు ఆరోపిస్తున్నాయి.

నోటీసులకు రెండేళ్లు...

మరణ శిక్షకు వ్యతిరేకంగా దోషులు పెట్టుకున్న పిటిషన్‌ను సుప్రీంకోర్టు 2017లో తిరస్కరించిన తర్వాత దోషులకు నోటీసు ఇచ్చేందుకు ఆప్‌ ప్రభుత్వానికి రెండేళ్లకు పైగా సమయం పట్టిందని కేంద్ర మంత్రి ప్రకాశ్​ జావడేకర్​ విమర్శించారు.