నిర్భయ అత్యాచార కేసు దోషులకు ఈ నెల 22న అమలు చేయాల్సిన మరణశిక్ష వాయిదా పడే సూచనలు కనిపిస్తున్నాయి. నలుగురు దోషుల ఉరిశిక్ష అమలు ప్రక్రియపై శుక్రవారం లోపు స్థితి నివేదిక సమర్పించాలని తిహార్ జైలు అధికారులను దిల్లీ కోర్టు ఆదేశించింది.
ఉరిశిక్షను వాయిదా వేయాలని నలుగురు దోషుల్లో ఒకడైన ముకేశ్ కుమార్ సింగ్ దాఖలు చేసిన పిటిషన్ను దిల్లీ కోర్టు విచారించింది. తాను రాష్ట్రపతికి దాఖలు చేసిన క్షమాభిక్ష పిటిషన్ పెండింగ్లో ఉన్నందున ఉరిని వాయిదా వేయాలని ముకేశ్ పిటిషన్లో కోరాడు.
నలుగురు దోషులకు మరణశిక్ష విధించిన తర్వాత జరిగిన పలు పరిణామాల దృష్ట్యా.. డెత్ వారెంట్లను పక్కన పెట్టాల్సిన అవసరం ఉందని ముకేశ్ తరఫు న్యాయవాది కోర్టును కోరారు.
రాష్ట్రపతి వద్ద క్షమాభిక్ష నిర్ణయం పెండింగ్లో ఉన్న నేపథ్యంలో జైలు అధికారులు దిల్లీ ప్రభుత్వానికి లేఖ రాశారు. ఈ విషయంపై జైలు అధికారులు దిల్లీ కోర్టుకు కూడా సమాచారం అందించారు. ఈ సమాచారాన్ని పరిశీలించిన దిల్లీ కోర్టు.... ఉరి అమలు చేసే తేదీపై శుక్రవారం లోపు సమగ్ర సమాచారంతో నివేదిక అందించాలని ఆదేశించింది.
జనవరి 7న దిల్లీ కోర్టు జారీ చేసిన డెత్ వారెంట్లను నిలిపివేయడానికి దిల్లీ హైకోర్టు నిరాకరించిన నేపథ్యంలో ముకేశ్ తరఫు న్యాయవాది ట్రయల్ కోర్ట్ను ఆశ్రయించారు.
