ప్రభుత్వ ఉద్యోగం చేసి.. పదవీ విరమణ పొందిన తర్వాత కుటుంబసభ్యులతో సంతోషంగా శేష జీవితాన్ని గడపాలని అనుకుంటారు. అయితే.. అందరి జీవితాలు అలా సాఫీగా సాగిపోవు. కొందరి జీవితాల్లో కష్టాలు చుట్టుముట్టి దుర్భర పరిస్థితులను కల్పిస్తాయి. అలాంటి జీవితాన్నే అనుభవించారు కర్ణాటక చిక్కబళ్లాపురకు చెందిన ఓ రిటైర్డ్ ఎస్సై. చెత్త ఏరుకుంటూ కడుపునింపుకునేవారు.
మధుసూధన్ రావ్.. బీఏలో డిగ్రీ పూర్తి చేశారు. నెలకి రూ.80 జీతంతో పోలీసు శాఖలో చేరారు. ముప్పై ఏళ్ల పాటు పలు జిల్లాల్లో ఎస్సైగా విధులు నిర్వర్తించి ఆరు సంవత్సరాల క్రితం పదవీ విరమణ చేశారు. అనంతరం బెంగళూరులోని ఉత్తరహళ్లిలో తన భార్య, పిల్లలతో ఉండేవారు. మూడేళ్ల క్రితం ఆయన భార్య మృతిచెందారు. ఆ తర్వాత కొద్ది రోజులకు ఇద్దరు కుమార్తెలు, కుమారుడు.. ఆయనతో ఇమడలేక తరుచూ గొడవపడటం మొదలుపెట్టారు. దాంతో నిరాశకు లోనైన మధుసూధన్ రావ్.. ఇంటి నుంచి బయటకువచ్చేశారు. చింతామనిలో యాచించటం ప్రారంభించారు.
కొన్ని నెలల పాటు యాచించిన తర్వాత.. అది తప్పుగా భావించిన ఆయన.. చెత్త ఏరుకుని విక్రయించటం ప్రారంభించారు. ప్రస్తుతం చింతామని టౌన్లో ప్లాస్టిక్ వస్తువులు, వాటర్ బాటిళ్లు, ఇతర చెత్త సేకరిస్తూ జీవనం సాగిస్తున్నారు.
సీఐ చొరవ..
మధుసూధన్ రావ్ పరిస్థితిని గమనించిన చింతామని సర్కిల్ ఇన్స్పెక్టర్ ఆనంద్.. ఆయన గురించి పూర్తి వివరాలు సేకరించారు. ఆయన రిటైర్డ్ ఎస్సై అని తెలిసిన వెంటనే మధుసూధన్ వద్దకు చేరుకుని ఆశ్రయం కల్పించారు. అనంతరం సమాజంలో గౌరవంగా జీవంచేలా కొత్త పనిని చూపించారు.
ఇదీ చూడండి: ఒకే కుటుంబానికి చెందిన ఐదుగురు మృతి
