యూట్యూబ్.. ఈ పేరు తెలియనివారు ఉండరు. దీనిని చూసి మనకు తెలియని ఎన్నో విషయాలు తెలుసుకోవచ్చు. విద్య, వైద్యం, శాస్త్రం, సాంకేతిక విషయాలు ఒకటేంటి ఏదైనా నేర్చుకోవచ్చు. అయితే ఓ యువకుడు యూట్యూబ్ చూసి ఏకంగా తన ప్రేయసికి శస్త్రచికిత్స చేయడానికి ప్రయత్నించాడు. అది విఫలమై పురిటిలోనే పసికందు ప్రాణాన్ని బలిగొన్నాడు. వైద్యులిచ్చిన సమాచారం మేరకు నిందితుడిని పోలీసులు అరెస్ట్ చేశారు. ఈ ఘటన చెన్నైలోని గుమ్మడిపూండిలో చోటుచేసుకుంది.
ఇదీ జరిగింది!
చెన్నైలోని గుమ్మడిపూండికి చెందిన సౌంధర్ అనే 27ఏళ్ల యువకుడు ఓ ప్రైవేటు గ్యాస్ ఏజెన్సీలో పని చేస్తున్నాడు. సౌంధర్కు ఓ కళాశాల యువతితో పరిచయం ఏర్పడింది. వారి పరిచయం ప్రేమకు దారితీసింది. అది అక్కడితో ఆగలేదు. వారిద్దరు శారీరకంగా దగ్గరై ఆ యువతి గర్భం దాల్చింది.
శస్త్రచికిత్స విఫలం!
విషయం తెలిసినా ఎనిమిదో నెలలు వరకు బాగానే ఉన్నారు. అయితే హఠాత్తుగా ఏమైందో గానీ ఎవరికి తెలియకుండా నెలలు నిండని పసికందును పురిటిలోనే చిదిమేయాలనే దుర్మార్గపు ఆలోచన సౌంధర్కు వచ్చింది. దీంతో యూట్యూబ్ చూసి తానే స్వయంగా శస్త్రచికిత్స చేయాడానికి పాల్పడ్డాడు. కానీ అది విఫలమైంది. పసికందు ప్రాణాల మీదకు వచ్చింది. ఆ యువతి పరిస్థితి కూడా విషమించడం వల్ల దగ్గరలో ఉన్న ప్రభుత్వ ఆసుపత్రికి తరలించాడు.
వైద్యులు ఎంతో చాకచక్యంగా శస్త్రచికిత్స చేసినప్పటికి చిన్నారిని రక్షించలేకపోయారు. వైద్యాధికారులు ఈ విషయాన్ని పోలీసులకు తెలియజేశారు. సమాచారం అందుకున్న పోలీసులు ఆసుపత్రికి చేరుకుని సౌంధర్ను అరెస్టు చేసి దర్యాప్తు చేస్తున్నారు.
ఇదీ చూడండి: 'నిత్యావసరాలపై ఆందోళన వద్దు.. ఒకేసారి కొనిపెట్టుకోకండి'
