వచ్చే వారం నాటికి దిల్లీలో కొవిడ్ రోగుల కోసం 20,000 పడకలు సిద్ధంగా ఉంటాయని కేంద్ర హోంమంత్రి అమిత్ షా పేర్కొన్నారు. ఇప్పటికే దిల్లీలోని కొవిడ్ కేర్ సెంటర్లలో 8,000 అదనపు పడకలను ఏర్పాటు చేసినట్లు ఆయన తెలిపారు.
" ప్రియమైన కేజ్రీవాల్ జీ, దిల్లీలోని రాధాస్వామి బియాస్ వద్ద ఏర్పాటుచేసిన 10,000 పడకల సంరక్షణ కేంద్రం జూన్ 26 నుంచి అందుబాటులోకి వస్తుంది. దీని నిర్వహణను ఐటీబీపీకి అప్పగించాం. అలాగే వచ్చే వారం నాటికి కరోనా రోగుల కోసం 20,000 పడకలు సిద్ధం చేస్తాం."
- అమిత్ షా ట్వీట్
10,000 పడకల కేంద్రాన్ని పరిశీలించి, కరోనా రోగుల చికిత్స కోసం ఐటీబీపీ, ఆర్మీకి చెందిన వైద్యులు, నర్సులను ఏర్పాటుచేయాలని ఇంతకు ముందు దిల్లీ ముఖ్యమంత్రి అరవింద్ కేజ్రీవాల్.. అమిత్షాకు లేఖ రాశారు. దీనికి సమాధానంగానే అమిత్షా తాజా ట్వీట్ చేశారు.
అమిత్ షా... 250 ఐసీయూ పడకలతో సహా 1000 పడకల పూర్తి స్థాయి ఆసుపత్రిని అభివృద్ధి చేస్తున్నామని; డీఆర్డీఓ, టాటా ట్రస్ట్ సంయుక్తంగా దీని ఏర్పాటుకు కృషి చేస్తున్నాయని... మరో 10 రోజుల్లో ఇది అందుబాటులోకి వస్తుందని తెలిపారు. ఈ ఆసుపత్రిని సాయుధ దళాల సిబ్బంది నిర్వహిస్తారని అమిత్ షా స్పష్టం చేశారు.
రైల్వే కోచ్ల్లో ఏర్పాటుచేసిన కొవిడ్ కేంద్రాల్లోనూ... సాయుధ దళాలకు చెందిన ఆరోగ్య సిబ్బంది వైద్య సేవలు అందిస్తారని అమిత్షా వెల్లడించారు.
ధన్యవాదాలు
అమిత్ షా ట్వీట్లపై దిల్లీ ముఖ్యమంత్రి కేజ్రీవాల్ సానుకూలంగా స్పందించారు. క్లిష్టసమయంలో ఆప్ ప్రభుత్వానికి, దిల్లీ ప్రజలకు సాయం చేసిన అమిత్ షాకు కృతజ్ఞతలు చెబుతున్నానని అన్నారు.
దిల్లీ కోసం భద్రతా దళాలు, సామాజిక సంస్థలు, కేంద్ర ప్రభుత్వం, దిల్లీ సర్కార్ అన్నీ ఐక్యంగా పనిచేస్తున్నాయని కేజ్రీవాల్ పేర్కొన్నారు. ఇదే విధంగా ముందుకు సాగితే కచ్చితంగా కరోనాను నియంత్రించగలమనే విశ్వాసం తనకుందన్నారు.
ఇదీ చూడండి: దేశ రాజధానిలో పట్టుబడ్డ రూ.40 కోట్ల హెరాయిన్‌
