అసెంబ్లీ ఎన్నికలు సమీపిస్తున్న వేళ బంగాల్లో పరిస్థితులు ఉద్రిక్తంగా మారుతున్నాయి. ఓ వైపు ప్రచార పర్వం ఊపందుకుంటుంటే మరోవైపు దాడి ఘటనలు పెరుగుతున్నాయి. తాజాగా బంగాల్ భాజపా అధ్యక్షుడు దిలీప్ ఘోష్ కాన్వాయ్పై దాడి జరిగింది. ఉత్తర 24 పరగణాల జిల్లా మినాఖా ప్రాంతంలోని మలాంచలో పార్టీ పరివర్తన యాత్ర నిర్వహిస్తున్న క్రమంలో టీఎంసీ కార్యకర్తలు తమపై రాళ్లు, బాంబు దాడులు చేసినట్లు భాజపా నేతలు వెల్లడించారు. ఈ ఘటనలో నలుగురు పార్టీ కార్యకర్తలు గాయపడినట్లు చెప్పారు.
అయితే.. ఈ ఘటనలో ఎలాంటి బాంబులు వినియోగించలేదని, ప్రాణనష్టం సంభవించలేదని పోలీసులు తెలిపారు. ఈ ఘటన తర్వాత భాజపా, టీఎంసీ నేతల మధ్య ఘర్షణ జరిగిందని వెల్లడించారు. రెండు వాహనాలు దెబ్బతిన్నట్లు చెప్పారు.
టీఎంసీ కార్యాలయం ధ్వంసం!
దిలీప్ ఘోష్ కాన్వాయ్పై దాడి జరిగిన నేపథ్యంలో అధికార తృణమూల్ కాంగ్రెస్పై తీవ్ర విమర్శలు చేసింది భాజపా. అయితే.. భాజపా ఆరోపణలను తిప్పికొట్టింది టీఎంసీ. మినాఖాలోని తమ పార్టీ కార్యాలయాన్ని కాషాయ పార్టీ కార్యకర్తలు ధ్వంసం చేసినట్లు తెలిపింది. అలాగే.. ఓ పాల వ్యాన్పైనా భాజపా గూండాలు దాడికి పాల్పడ్డారని ఆరోపించింది.
పెరుగుతున్న దాడులు..
కొద్ది రోజుల క్రితం మినాఖా ప్రాంతంలో జరిగిన ఘర్షణలో భాజపా నేత పిటోజ్ కమల్ గాజీ గాయపడ్డారు. అలాగే.. గత ఏడాది డిసెంబర్లో దక్షిణ 24 పరగణాల జిల్లాలో భాజపా జాతీయ అధ్యక్షుడు జేపీ నడ్డా కాన్వాయ్పై రాళ్లదాడి జరిగింది.
ఇదీ చూడండి: మధ్యప్రదేశ్ బస్సు ప్రమాదంలో 54కు చేరిన మృతులు
