బంగాల్ దారుణమైన ఘటన వెలుగు చూసింది. శ్రద్ధా వాకర్ను అఫ్తాబ్ హత్య చేసిన విధంగానే.. ఓ యువకుడు తన తండ్రిని చంపాడు. ఆ మృతదేహాన్ని ఆరు ముక్కలుగా చేసి.. వివిధ ప్రాంతాల్లో పడేశాడు. డబ్బు విషయంలో గొడవ పడిన యువకుడు ఈ దారుణానికి పాల్పడినట్లు పోలీసులు ప్రాథమిక విచారణలో గుర్తించారు. ఈ ఘటనలో నిందితుడి తల్లితో పాటుగా.. మరికొంత మంది హస్తం ఉండొచ్చని పోలీసులు అనుమానం వ్యక్తం చేస్తున్నారు. నవంబర్ 12న ఈ దారుణం జరగగా.. తాజాగా పోలీసులు కేసు నమోదు చేయడం వల్ల ఈ విషయం వెలుగులోకి వచ్చింది.
పోలీసుల కథనం ప్రకారం..
ఉత్తర 24పరగణాలు జిల్లాలోని బరుయిపుర్ ప్రాంతంలో ఉజ్జ్వల్ చక్రవర్తి అనే మాజీ నేవీ ఉద్యోగి.. తన కుమారుడు జాయ్ చేతిలో హత్యకు గురయ్యాడు. జాయ్ ప్రస్తుతం వడ్రంగి పనికి సంబంధించి ఓ ప్రత్యేక కోర్సులో డిప్లొమా చదువుతున్నాడు. నిత్యం తండ్రీకొడుకుల మధ్య డబ్బు విషయంలో వాగ్వాదం జరిగేది. నవంబర్ 12న జాయ్ తన తండ్రితో రూ.3,000 కోసం గొడవ పడ్డాడు. కోపంతో తన వద్దనున్న రంపంతో తండ్రి గొంతు కోసి హత్య చేశాడు. ఆ తర్వాత తల్లి సహాయంతో మృతదేహాన్ని ఆరు ముక్కలుగా చేశాడు. అనంతరం ఆ భాగాలను ప్లాస్టిక్ కవర్లో చుట్టి.. సైకిల్ మీద తీసుకువెళ్లి ఖాస్మల్లిక్, దేహిమెదన్ మల్లా అనే ప్రాంతాల్లో అక్కడక్కడా పడేశాడు.
స్థానికులు నవంబర్ 18న చెరువులో కొన్ని శరీర భాగాలను గుర్తించి.. పోలీసులకు సమాచారం అందించారు. పోలీసులు ఆ శరీర భాగాలు ఉజ్జ్వల్వని గుర్తించారు. ఉజ్జ్వల్ భార్య, కుమారుడిపై అనుమానంతో పోలీసులు వారిని విచారించగా.. జాయ్నే ఈ హత్య చేసినట్లు వెల్లడించాడు. మృతదేహాన్ని ముక్కలుగా చేయడానికి రంపాన్ని ఉపయోగించినట్లు జాయ్ తెలిపాడు. ఈ కేసులో తల్లి, కుమారుడితో పాటు మరికొంత మందికి ఇందులో ప్రమేయం ఉండొచ్చని పోలీసులు అనుమానిస్తున్నారు. ప్రస్తుతం తల్లి, కుమారుడి ఫోన్ డేటాను పరిశీలిస్తున్నట్లు పోలీసులు వెల్లడించారు.
స్థానికులు వాదన ఇలా.. ఉజ్జ్వల్ కుటుంబానికి స్థానికంగా ఎవరితోనూ మంచి సంబంధాలు లేవని.. జాయ్కు అతని తండ్రి చిన్నప్పటి నుంచే కరాటేలో శిక్షణ అందించారని స్థానికులు తెలిపారు. జాయ్ మాత్రం చిన్నప్పటి నుంచే స్నేహితులతో గొడవపడి.. అల్లర చిల్లరగా తిరిగే వాడని చెప్పారు. తండ్రీకొడుకులు అప్పుడప్పుడు డబ్బులు కోసం గొడవ పడే వారు కానీ.. జాయ్నే ఈ హత్య చేశాడంటే ఆశ్చర్యంగా ఉందని కొందరు స్థానికులు అంటున్నారు. ఇరుగుపొరుగు వారు మాత్రం ఈ హత్య జాయ్ ఆవేశంలో చేసి ఉండొచ్చని అభిప్రాయపడుతున్నారు.
