Babri masjid demolition: వివాదాస్పద బాబ్రీ మసీదు కూల్చివేత కేసు మరోసారి తెరమీదకు వచ్చింది. ఈ కేసులో భాజపా అగ్రనేతలు ఎల్కే అడ్వాణీ, మురళీ మనోహర్ జోషి సహా 32 మందిని నిర్దోషులుగా ప్రకటిస్తూ ఇచ్చిన తీర్పును వ్యతిరేకిస్తూ దాఖలైన రివ్యూ పిటిషన్ను క్రిమినల్ అప్పీలుగా పరిగణించనున్నట్లు అలహాబాద్ హైకోర్టు పేర్కొంది. ఆగస్టు 1న ఈ వ్యాజ్యంపై విచారణ చేపట్టనున్నట్లు హైకోర్టు లఖ్నవూ బెంచ్ స్పష్టం చేసింది.
అయోధ్య నివాసులైన హజీ మహమ్మద్ అహ్మద్, సయ్యద్ అఖ్లాక్ అహ్మద్ ఈ రివ్యూ పిటిషన్ దాఖలు చేశారు. అయితే, ఇది విచారణయోగ్యమైన వ్యాజ్యం కాదని జస్టిస్ దినేశ్ కుమార్ సింగ్ వ్యాఖ్యానించారు. ఈ కేసు విచారణ జులై 11నే జరగాల్సి ఉంది. పిటిషనర్ అభ్యర్థనతో జులై 18కి వాయిదా పడింది. అయితే, మరోసారి కేసును వాయిదా వేసేది లేదని పిటిషనర్ తరఫు న్యాయవాదికి కోర్టు తేల్చిచెప్పింది.
కేసు నేపథ్యం ఇదీ..
1992 డిసెంబర్ 6న కరసేవకులు బాబ్రీ మసీదును కూల్చివేశారు. దీనిపై విచారించిన సీబీఐ స్పెషల్ కోర్టు.. అనేక సంవత్సరాల విచారణ అనంతరం 2020 సెప్టెంబర్ 30న తీర్పును వెలువరించింది. ఆనాటి ఉత్తర్ప్రదేశ్ ముఖ్యమంత్రి కల్యాణ్ సింగ్, భాజపా సీనియర్ నేతలు మురళీ మనోహర్ జోషీ, ఎల్కే అడ్వాణీ, ఉమా భారతి సహా పలువురిని నిర్దోషులుగా ప్రకటించింది కోర్టు. న్యూస్ పేపర్ కటింగ్స్, వీడియో క్లిప్స్ను సాక్ష్యాధారాలుగా పరిగణనలోకి తీసుకోమని చెప్పింది. మసీదు కూల్చివేతకు, కరసేవకులకు సంబంధం ఉన్నట్లు సీబీఐ ఎలాంటి ఆధారాలు సమర్పించలేదని పేర్కొంది.
ఇవీ చదవండి: ఎన్డీఏ ఉపరాష్ట్రపతి అభ్యర్థిగా ధన్ఖడ్ నామినేషన్
