Ayodhya Ram Mandir Aarti Pass : ప్రారంభోత్సవానికి సిద్ధమవుతున్న అయోధ్య రామాలయంలో హారతి కార్యక్రమానికి హాజరయ్యేందుకు భక్తులను ఆహ్వానిస్తోంది ఆలయ ట్రస్టు. ఇప్పటివరకు ఆఫ్లైన్లో జారీ చేస్తున్న పాసులను ఆన్లైన్లోనూ అందుబాటులో ఉంచింది. ప్రారంభోత్సవం అనంతరం రోజుకు మూడు పూటలు హారతి కార్యక్రమం ఉంటుందని ఆలయ ట్రస్టు అధికారులు తెలిపారు. భక్తులకు ఉచితంగానే ఈ పాసులను అందిస్తోంది ట్రస్టు. హారతి కార్యక్రమానికి 30 మంది భక్తులకే అనుమతి ఉంటుందని సంబంధిత సెక్షన్ మేనేజర్ ధ్రువేశ్ మిశ్ర స్పష్టం చేశారు.
"రామజన్మభూమిలో రోజుకు మూడుసార్లు హారతి కార్యక్రమం ఉంటుంది. ఉదయం శృంగార హారతి, మధ్యాహ్నం భోగ హారతి, సాయంత్రం సంధ్యా హారతి నిర్వహిస్తారు. ఎవరి దగ్గర అయితే పాసులు ఉంటాయో వారే హారతి కార్యక్రమానికి వెళ్లే అవకాశం ఉంటుంది. నిబంధనల ప్రకారం ప్రస్తుతానికి 30 మంది వెళ్లేందుకు మాత్రమే అనుమతి ఉంది. ఆన్లైన్లోనూ ఈ సేవ అందుబాటులో ఉంది. రామజన్మభూమి అధికార వెబ్సైట్లో హారతి పాసు కోసం దరఖాస్తు చేసుకోవచ్చు. ఆన్లైన్లో అప్లై చేసిన తర్వాత ఇక్కడి వచ్చి కేంద్రంలో పాసులు తీసుకొని హారతికి వెళ్లొచ్చు."
-ధ్రువేశ్ మిశ్ర, ఆయోధ్య రామాలయం హారతి పాసుల సెక్షన్ మేనేజర్
భద్రతా కారణాల రీత్యా హారతికి 30 మందిని మాత్రమే అనుమతిస్తున్నారని, భవిష్యత్లో ఈ పరిమితిని సడలించే అవకాశాలు ఉన్నాయని అధికారులు పేర్కొన్నారు. ఆధార్, ఓటర్ ఐడీ, డ్రైవింగ్ లైసెన్స్, పాస్పోర్ట్లో ఏదైనా ధ్రువపత్రాన్ని చూపించి పాసులు తీసుకోవచ్చని తెలిపారు. ఆన్లైన్లో 20 చొప్పున పాసులు అందుబాటులో ఉంటాయని, నచ్చిన తేదీలకు ముందస్తు బుక్ చేసుకోవచ్చని చెప్పారు.
మరోవైపు, భక్తులు తమ వస్తువులను భద్రపరుచుకునేందుకు వీలుగా ఆలయ పరిసరాల్లో లాకర్ సెంటర్ను ఏర్పాటు చేశారు. 700కు పైగా లాకర్లు ఇక్కడ అందుబాటులో ఉన్నాయి. సీసీ కెమెరాల నిఘా మధ్య ఈ లాకర్ కేంద్రాన్ని ఏర్పాటు చేశారు. లగేజీ భద్రపరుచుకునేందుకు సైతం సెంటర్లను ఏర్పాటు చేసింది ట్రస్ట్.
భద్రత కట్టుదిట్టం
ప్రారంభోత్సవం నేపథ్యంలో అయోధ్యలో కట్టుదిట్టమైన భద్రత ఏర్పాటు చేస్తున్నారు. రామాలయం ప్రాంగణంలో సెక్యూరిటీ కెమెరాలను ఏర్పాటు చేశారు. వాహనాల స్కానింగ్ పరికరాలు, రహదారులపై బ్యారియర్లు నెలకొల్పినట్లు అధికారులు తెలిపారు. వాహనాల్లో ఏదైనా నిషేధిత వస్తువులు తీసుకెళ్తే గుర్తించేలా సాంకేతికత ఉపయోగిస్తున్నట్లు చెప్పారు.
