Ayodhya Deepotsav 2023 Rehearsal Success : ఉత్తర్ప్రదేశ్‌లోని అయోధ్య రాముడి దర్శనానికి భారీగా తరలివచ్చే భక్తులను సమన్వయం చేయడానికి ట్రయల్స్లో భాగంగా నిర్వహించిన దీపోత్సవ కార్యక్రమం విజయవంతమైందని శ్రీరామ జన్మభూమి తీర్థ క్షేత్ర ట్రస్ట్ తెలిపింది. నవంబర్ 11న నిర్వహించిన దీపోత్సవానికి 2 లక్షల మంది భక్తులు హాజరైనట్లు తెలిపింది. నవంబర్ 10 నుంచి 14 వరకు ప్రత్యేకంగా నిర్వహించిన కార్యక్రమాల్లో భక్తులు లక్షల్లో పాల్గొన్నట్లుగా పేర్కొంది. దీపోత్సవం రోజునే ఏకంగా 2 లక్షల మందికిపైగా ప్రజలు శ్రీరాముడిని దర్శించుకున్నారని విశ్వహిందూ పరిషత్ మీడియా ఇంఛార్జ్ శరద్ శర్మ వెల్లడించారు.
"అయోధ్య రామమందిర నిర్మాణానికి సంబంధించి సోషల్ మీడియాలో, టీవీల్లో వస్తున్న ప్రకటనలను చూసి భక్తులు పెద్ద సంఖ్యలో ఆలయానికి వస్తున్నారు. అయితే నవంబర్ 11న నిర్వహించిన దీపోత్సవ కార్యక్రమం తర్వాత ఈ సంఖ్య మరింత పెరుగుతూ వస్తోంది. ప్రతి సంవత్సరం భక్తుల సంఖ్య పెరుగుతోంది. నా అంచనా ప్రకారం ఈ ఏడాది 3 లక్షలకుపైగా భక్తులు అయోధ్య రాముడిని దర్శించుకున్నారు. ఈ దీపోత్సవం విజయవంతం కావడానికి యోగి సర్కార్ కూడా ప్రత్యేకంగా చొరవ చూపించింది. వారిని మేము అభినందిస్తున్నాము."
-శరద్ శర్మ, విశ్వహిందూ పరిషత్ మీడియా ఇంఛార్జ్
రిహార్సల్గా దీపోత్సవం..
జనవరి 22న జరిగే ప్రాణప్రతిష్ఠ మహోత్సవానికి హాజరయ్యే లక్షలాది భక్తులను సమన్వయం చేసుకోవడానికి ట్రయల్గా దీపోత్సవం నిర్వహించినట్లు ట్రస్టు సభ్యులు తెలిపారు. భక్తులు ఇబ్బందులకు గురికాకుండా రాముడిని దర్శించుకొని వెళ్లేలా ఏర్పాట్లు చేశామని చెప్పారు. బృందాలుగా ఏర్పడిన రామభక్తుల సాయంతో.. సాధారణ ప్రజలకు సులువుగా దర్శనం అయ్యేలా ఏర్పాట్లు చేశారు నిర్వాహకులు. వివిధ చెక్పాయింట్లను ఏర్పాటు చేసి... ఎటువంటి తొక్కిసలాటలు జరగకుండా క్యూలైన్లో భక్తులను రాముడిని దర్శనానికి పంపించారు. దీపోత్సవానికి వచ్చిన భక్తుల సంఖ్య ఆధారంగా రానున్న రోజుల్లో ఎంతమంది వస్తారనే అంచనాకు వచ్చి మరిన్ని మెరుగైన ఏర్పాట్లు చేయనున్నట్లు నిర్వాహకులు చెప్పారు.
"రాముడి భక్తుల కోసం అయోధ్య రామమందిరం నిర్మాణం పూర్తి చేసుకొని సిద్ధంగా ఉంది. వచ్చే ఏడాది జనవరి 22 నుంచి 24 వరకు ఆలయం ప్రారంభోత్సవ కార్యక్రమాలు జరుగుతాయి. ఇక నవంబర్ 11న నిర్వహించిన దీపోత్సవం భారత్లో మాత్రమే కాదు ప్రపంచంలోనే గిన్నిస్ రికార్డ్ను సాధించింది. దీపోత్సవానికి వచ్చిన భక్తులను నూతనంగా నిర్మించిన ఆలయంలోకి కూడా అనుమతించారు. ఆ సమయంలో లక్షలాది మంది భక్తులు అయోధ్య రామయ్యను దర్శించుకున్నారు. దీపోత్సవం తర్వాత కూడా ఆలయానికి భక్తుల తాకిడి మరింతగా పెరిగింది. శ్రీరాముడి ప్రాణప్రతిష్ఠ తర్వాత రానున్న రోజుల్లో కూడా ఈ సంఖ్య గణనీయంగా పెరిగే అవకాశం ఉంది."
- ఆచార్య సత్యేంద్ర దాస్, రామ్లల్లా ప్రధాన అర్చకులు
ఇక వచ్చే ఏడాది జనవరిలో జరిగే అయోధ్య శ్రీరాముడి ఆలయ ప్రారంభోత్సవానికి దేశం నలుమూలల నుంచి భారీ సంఖ్యలో భక్తులు హాజరయ్యే అవకాశం ఉంది. ప్రముఖులతో పాటు అనేక మందిని ఈ కార్యక్రమానికి ఆహ్వానించింది శ్రీరామ జన్మభూమి ట్రస్టు. వీరికోసం ప్రత్యేకంగా ఏర్పాట్లు కూడా చేస్తోంది.
అయోధ్యలో యముడికి ప్రత్యేక పూజలు- దీపావళి తర్వాత పెద్ద జాతర!
22లక్షల దీపాల వెలుగులో అయోధ్య- ఉజ్జయిని రికార్డు బ్రేక్, గిన్నిస్లో చోటు
