Banner for second wife: మహారాష్ట్ర, ఔరంగాబాద్లో ఓ వ్యక్తి హాట్టాపిక్గా మారాడు. తనకు రెండో భార్య కావాలంటూ నగరం మొత్తం బ్యానర్లు ఏర్పాటు చేయటమే అందుకు కారణం. కాబోయే భార్యకు ఎలాంటి లక్షణాలు ఉండాలనే విషయాన్నీ వాటిలో పేర్కొన్నాడు.
అసలు కథ ఇది..
ఔరంగాబాద్ మున్సిపల్ ఎన్నికలు కొద్ది రోజుల్లో రానున్నాయి. రమేశ్ పాటిల్ అనే వ్యక్తి పోటీ చేయాలనుకున్నాడు. కానీ, అతనికి ముగ్గురు పిల్లలు ఉండటం వల్ల ఎన్నికల్లో పోటీ చేసే అర్హత కోల్పోయాడు. ఎలాగైనా బరిలో నిలవాల్సిందేనని పట్టుదలతో ఉన్న రమేశ్.. ఓ ఉపాయం చేశాడు. తాను నిలబడలేకపోయినా.. తన కుటుంబంలో నుంచి ఒకరిని పోటీలో నిలపాలనుకున్నాడు. అయితే, సోదరుడు, సోదరి, తల్లిదండ్రులను కాదండోయ్.. రెండో పెళ్లి చేసుకుని వచ్చే భార్యను ఎన్నికల్లో పోటీ చేయించాలని సంకల్పించుకున్నాడు.
ఎన్నికల్లో పోటీ చేసేందుకు తనకు రెండో భార్య కావాలంటూ ఏకంగా నగరం మొత్తం బ్యానర్లు కట్టించాడు. తనకు కాబోయే భార్య ఎలా ఉండాలో ఆ హోర్డింగుల్లో పేర్కొన్నాడు. ఏ మతం అయినా, పెళ్లి కాని లేక భర్తతో విడిపోయిన, భర్త మరణించిన 25 నుంచి 40 ఏళ్ల మహిళ అర్హురాలిగా తెలిపాడు. అయితే, పెళ్లి అయి ఉంటే ఆ మహిళకు ఇద్దరు పిల్లలు మాత్రమే ఉండాలనే షరతు పెట్టాడు. తన ఫోన్ నంబర్ సైతం బ్యానర్లలో అచ్చు వేయించాడు.
ఇప్పుడు ఆయన ప్రకటనపైనే నగర జనం మొత్తం చర్చించుకుంటున్నారు.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి: 'టీకా తీసుకుంటే నా 8 మంది పిల్లలేంగాను?'.. వీడియో వైరల్
