భాజపా నేత కారులో ఈవీఎం- రీపోలింగ్​కు ఈసీ ఆదేశం

అసోంలో గురువారం రాత్రి.. భాజపా అభ్యర్థి వాహనంలో ఈవీఎం బయటపడటం తీవ్ర కలకలం రేపింది. ఈ ఘటనతో కరీమ్​గంజ్​ నియోజకవర్గంలో భాజపా, ఇతర పార్టీల కార్యకర్తల మధ్య ఘర్షణ చెలరేగింది. స్పందించిన ఎన్నికల సంఘం.. ఇందుకు కారణమైన అధికారులను సస్పెండ్ చేసింది. సదరు నియోజకవర్గంలో రీపోలింగ్​ జరపాలని ఆదేశించింది.

అసోం కరీమ్‌గంజ్ జిల్లాలో ఓ భాజపా అభ్యర్థి వాహనంలో ఎలక్ట్రానికి ఓటింగ్​ యంత్రం​(ఈవీఎం) బయటపడటం తీవ్ర ఘర్షణలకు దారి తీసింది. గురువారం పోలింగ్ పూర్తైన తర్వాత.. ఈవీఎంను సదరు భాజపా అభ్యర్థికి చెందిన వాహనంలో తరలించడాన్ని ఇతర పార్టీల కార్యకర్తలు గుర్తించి వాగ్వాదానికి దిగారు. పరిస్థితిని అదుపులోకి తెచ్చేందుకు పోలీసులు తీవ్రంగా శ్రమించారు. ఈ క్రమంలో ఓ దశలో గాల్లోకి కాల్పులు కూడా జరిపారు.

ప్రైవేట్​ వాహనంలో తరలించిన ఈవీఎం

ఏం జరిగిందంటే?

రతబరి నియోజకవర్గ పరిధిలోని ఇందిరా ఎంవీ పాఠశాల పోలింగ్‌ కేంద్రం నుంచి ఈవీఎంలను స్ట్రాంగ్‌కు తరలించే క్రమంలో వాహనం పాడవడం వల్ల.. ఓ ప్రైవేటు కారును ఆపి అందులో తరలించారు. అయితే.. ఆ వాహనం భాజపా సిట్టింగ్ ఎమ్మెల్యే పాథర్‌కాంది కృష్ణేందు పాల్ పేరు మీద ఉండడం యాదృచ్ఛికమేనని అధికారులు వివరణ ఇచ్చారు. ఏఐడీయూఎఫ్​, కాంగ్రెస్ కార్యకర్తలు ఆ వాహనంపై దాడికి దిగారని తెలిపారు. పరిస్థితిని చక్కదిద్దిన అనంతరం ఈవీఎంలను స్ట్రాంగ్‌ రూమ్‌కు తరలించినట్లు పోలీసులు స్పష్టం చేశారు.

రీపోలింగ్​..

ఈ ఘటనపై తీవ్రంగా స్పందించింది ఎన్నికల సంఘం. ఇందుకు కారణమైన ఎన్నికల ప్రిసైడింగ్​ అధికారి సహా.. మరో ముగ్గురు అధికారులను సస్పెండ్​ చేస్తున్నట్టు ప్రకటించింది. ఆ ఈవీఎంపై తొలుత సీల్​ చేసిన ముద్రలు చెక్కుచెదరకుండా ఉన్నప్పటికీ.. సదరు నియోజకవర్గంలో మళ్లీ ఎన్నికలు నిర్వహించాలని ఆదేశించింది.

భాజపాపై విరుచుకుపడ్డ ప్రియాంక..

ఈ ఘటనపై తీవ్రంగా స్పందించారు కాంగ్రెస్​ ప్రధాన కార్యదర్శి ప్రియాంక గాంధీ వాద్రా. ఎన్నికల్లో ఈవీఎంల వాడకాన్ని పునఃపరిశీలించాలని జాతీయ పార్టీ నాయకులను కోరారామె. ఈ ఘటనకు సంబంధించిన వీడియోలు సోషల్​ మీడియాలో వైరల్​ కావడంపై ట్విట్టర్​ వేదికగా భాజపాపై విమర్శలు గుప్పించారు. ఈవీఎం ఘటనలు వెలుగుచూసిన ప్రతిసారీ.. అందులో భాజపా హస్తం ఉంటోందని ఆరోపించారు.

ప్రియాంక గాంధీ ట్వీట్​

"ప్రతిసారీ ఈవీఎంలను ప్రైవేట్​ వాహనాల్లో తరలించే అన్ని దృశ్యాలు కనిపిస్తున్నాయి. ఇందులో ఆశ్చర్యకర విషయం ఏమిటంటే.. మూడు అంశాలు అన్నింటిలో ఒకేలా ఉన్నాయి. 1) ఆ వాహనాలు సాధారణంగా భాజపా అభ్యర్థులు లేదా వారి అనుచరులకు సంబంధించినవే అయి ఉండటం. 2) ఈ వీడియోలకు సంబంధించిన కేసులన్నింటినీ కొట్టివేయడం. 3) ఈ దృశ్యాలను బహిర్గతం చేసినవారిపైనే భాజపా ఆరోపణలు చేయడం" అని ట్విట్టర్​లో పేర్కొన్నారు ప్రియాంక.

ఈవీఎంలకు సంబంధించిన ఫిర్యాదులపై.. ఎన్నికల సంఘం చర్యలు తీసుకోవాలని కాంగ్రెస్​ నేత కోరారు.

తిప్పికొట్టిన భాజపా ఎంపీ..

ప్రియాంక గాంధీ ఆరోపణల్ని తిప్పికొట్టారు ఆ రాష్ట్ర భాజపా ఎంపీ దిలీప్​ సైకియా. కాంగ్రెస్​ గెలిచినప్పుడు ఈవీఎంలు బాగానే ఉన్నాయి కానీ వారు ఓడినప్పుడు మాత్రం ఈవీఎంలు సరిగ్గా పనిచేయవని ప్రతిదాడికి దిగారు. ఇలాంటి ఆరోపణలు హస్తం పార్టీకి అలవాటేనని ఆయన అన్నారు.

ఇదీ చదవండి: అసోం పోరులో ప్రజలను ఏజీపీ మెప్పించేనా?