ఒకే చోట కలిసిన 2,537 మంది అష్రఫ్​ పేరున్న వ్యక్తులు.. ప్రపంచ రికార్డ్​ సొంతం.. అందుకోసమేనట!

ఒకే తరగతికి చెందిన విద్యార్థులు అందరూ ఒకచోట కలుసుకోవడం తరుచుగా చూస్తుంటాం. కానీ ఒకే పేరుతో ఉన్న వ్యక్తులు కలవడం చూసుండం కదా..! కానీ కేరళ కోజీకోడ్​లో మాత్రం ఒకే పేరున్న 2,537 మంది ఒకేచోట సమావేశమై ప్రపంచ రికార్డు నెలకొల్పారు.

కేరళ కోజీకోడ్​ బీచ్​లో సోమవారం అష్రఫ్​ అనే పేరుగల 2,537 మంది సమావేశమై ప్రపంచ రికార్డు సృష్టించారు. 14 జిల్లాలకు చెందిన సుమారు 3 సంవత్సరాల వయసు నుంచి 80 వయసు మధ్య గల అష్రఫ్​ అనే పేరు గల వ్యక్తులు సమావేశమయ్యారు. అనంతరం అష్రఫ్​ పేరు ఆకారంలో నిలబడ్డారు. దీనికి గాను 'లార్జెస్ట్​ సేమ్​ నేమ్​ గ్యాథరింగ్​' యూఆర్​ఎఫ్​ రికార్డును సాధించారు. అంతకుముందు ఈ రికార్డు కుబ్రోస్కీ అనే పేరుపై ఉంది. 2,325 మంది కలిసి ఒకేచోట చేరారు. ఈ కార్యక్రమానికి రాష్ట్ర మంత్రి అహ్మద్​ దేవర్​కోవిల్​ ముఖ్య అతిథిగా హాజరయ్యారు. మొత్తం 3,000 మంది అష్రఫ్​లు సమావేశం కావాలని నిర్ణయించగా.. 2,537 మంది కలిశారు. అనంతరం వీరందరూ 'డ్రగ్​ ఫ్రీ కేరళ' కార్యక్రమంపై అవగాహన కల్పించేందుకే సమావేశమయ్యారు.

అష్రఫ్​ ఆకారంలో నిలబడిన వ్యక్తులు

జూన్​ 2018లో మలప్పురం జిల్లాలోని కుట్టిల్​లో తొలిసారి నలుగురు అష్రఫ్​ పేరున్న వ్యక్తులు అనుకోకుండా కలిశారు. అనంతరం ఓ టీ షాప్​నకు వెళ్లగా.. అక్కడ యజమాని పేరు సైతం అష్రఫే. దీంతో అక్కడే కూర్చున్న ఓ వ్యక్తి అష్రఫ్​ల సమావేశమా అని ప్రశ్నించాడు. ఆ ఆలోచనతో మొదలై.. ఓ కమిటీని రూపొందించి అంతిమంగా అష్రఫ్​ సంగమాన్ని ఏర్పాటు చేశారు.

కార్యక్రమంలో పాల్గొన్న మంత్రి

రికార్డును అందుకుంటున్న నిర్వహకులు

ఇవీ చదవండి: స్నాక్స్​లో మత్తుమందు కలిపిన నవవధువు.. భర్త, అత్తమామలు స్పృహ తప్పాక పరార్​!