ఒకరికి తెలియకుండా మరొకరిని వివాహమాడుతూ వరుస పెళ్లిళ్లతో నిత్య పెళ్లికొడుకుగా మారిన ఓ ఉపాధ్యాయుడి అసలు స్వరూపం బయటపడింది. లాక్డౌన్లో ఇద్దరు మహిళల్ని పెళ్లాడిన అతడిపై.. ఒడిశా కటక్ పోలీస్ స్టేషన్లో కేసు నమోదైంది.
ఏం జరిగిందంటే.?
వృత్తి రీత్యా ఉపాధ్యాయుడైన కృష్ణచంద్ర నాయక్.. కటక్ జిల్లా సలేపుర్ ప్రాంతంలోని ఓ పాఠశాలలో పనిచేస్తున్నాడు. అతడికి తొలిసారిగా 2001లో ఓ మహిళతో వివాహమైంది. ఆ తర్వాత 2008లో రెండోసారి ఇంకొకరిని పెళ్లాడాడు. ఇలా ఒకరికి తెలియకుండా మరొకరితో వేరు వేరు కాపురాలు పెట్టాడట. ఇదిలా ఉండగా.. లాక్డౌన్ కాలంలో మరోసారి పెళ్లికి సిద్ధమయ్యాడు కృష్ణచంద్ర. ఈ సారి ఏకంగా స్వల్ప వ్యవధిలోనే ఇద్దరిని మనువాడాడు. దీంతో ఎట్టకేలకు అతడి బాగోతం బయటపడింది.
విషయం తెలిసిన మొదటి, మూడో భార్యలిద్దరూ పోలీస్ స్టేషన్ను ఆశ్రయించారు. తమకు న్యాయం చేయాలని కోరుతూ.. అతడిపై ఫిర్యాదు చేశారు. కేసు నమోదు చేసుకున్న ట్విన్ సిటీ కమిషనరేట్ పోలీసులు.. నిందితుణ్ని అరెస్ట్ చేశారు. బాధితుల ఫిర్యాదు ఆధారంగా అతడిపై భారతీయ శిక్షాస్మృతి(ఐపీసీ) సెక్షన్లు-493ఏ, 323, 294, 494, 500, 34 సహా.. వరకట్న నిషేధ చట్టం-4 కింద కేసు నమోదు చేసినట్టు పేర్కొన్నారు.
ఇదీ చదవండి: ఉరిశిక్షకు కాలపరీక్ష! - కేసుల పరిష్కరణలో జాప్యం
