ప్రధానమంత్రి నరేంద్ర మోదీని విమర్శిస్తూ పోస్టర్లు వేశారనే ఆరోపణలతో కొంతమందిపై దిల్లీ పోలీసులు చర్యలు తీసుకోవడంపై కాంగ్రెస్ ఆగ్రహం వ్యక్తం చేసింది. వ్యాక్సిన్లపై ప్రశ్నలు అడుగుతున్నందున తమను కూడా అరెస్టు చేయాలని సవాలు విసిరింది. ఈ మేరకు ఆ పార్టీ అగ్రనేత రాహుల్ గాంధీ.. ట్విట్టర్లో ప్రొఫైల్ చిత్రం మార్చారు.
"మోదీజీ మా పిల్లల టీకాలను విదేశాలకు ఎందుకు పంపించారు?" అనే ఫొటోను షేర్ చేసిన రాహుల్ గాంధీ.. తనను కూడా అరెస్టు చేయాలని సవాలు విసిరారు.
నన్ను అరెస్టు చేయండి..
"ప్రధాన మంత్రిని విమర్శిస్తూ పోస్టర్లు ప్రదర్శించడం ఇప్పుడు నేరమా? భారత్లో మోదీ పీనల్ కోడ్ అమల్లో ఉందా? కొవిడ్ మహమ్మారి విజృంభణ వల్ల దిల్లీ పోలీసులకు పనిలేకుండా పోయింది. నేను రేపు నా ఇంటి గోడ మీద పోస్టర్లు అంటిస్తాను. రండి నన్ను అరెస్టు చేయండి." అని కాంగ్రెస్ సీనియర్ నేత జైరాం రమేష్ విమర్శించారు.
ప్రశ్నలు వస్తూనే ఉంటాయి..
దేశంలో ప్రజలకు వ్యాక్సిన్లు అందుబాటులో లేనప్పుడు ప్రశ్నలు పస్తూనే ఉంటాయని విలేకరుల సమావేశంలో కాంగ్రెస్ అధికార ప్రతినిధి పవన్ ఖేరా పేర్కొన్నారు.
"ధైర్యం ఉంటే నన్ను అరెస్టు చేయండి. నా వ్యాక్సిన్ ఎక్కడ? నా ఆక్సిజన్ ఎక్కడ? మేం ప్రశ్నలు అడుగుతూనే ఉంటాం. కరోనా సంక్షోభాన్ని ప్రభుత్వం సరిగా ఎదుర్కోలేకపోయింది."
-పవన్ ఖేరా, కాంగ్రెస్ అధికార ప్రతినిధి
గతంలో భారత్లో పోలియో వంటి ఎన్నో టీకా కార్యక్రమాలు విజయవంతంగా కొనసాగాయని పవన్ ఖేరా అన్నారు. కానీ, ప్రధాని మోదీ హయాంలో కొవిడ్ టీకా పంపిణీ సరైన విధంగా కొనసాగలేదని ఎద్దేవా చేశారు.
ఇదీ చూడండి: 'తౌక్టే' బీభత్సం- కర్ణాటకలో నలుగురు మృతి
