తమిళనాడులోని నాగపట్నం జిల్లాకు చెందిన ఓ ఆర్మీ జవాన్ మాట్లాడిన వీడియో ఒకటి.. సామాజిక మాధ్యమాల్లో చర్చనీయాంశంగా మారింది. తన భార్యను కొందరు వ్యక్తులు అర్ధనగ్నంగా చేసి, దారుణంగా కొట్టారని ఆ జవాన్ చెబుతున్న వీడియో.. ట్విట్టర్లో ప్రత్యక్షమైంది. రిటైర్డ్ ఆర్మీ ఆఫీసర్ లెఫ్టినెంట్ కల్నల్ ఎన్. త్యాగరాజన్.. ట్విట్టర్లో ఈ వీడియో పోస్ట్ చేశారు.
కడవాసల్ గ్రామానికి చెందిన ప్రభాకరన్ అనే ఆర్మీ జవాన్.. జమ్ముకశ్మీర్‌లో విధులు నిర్వర్తిస్తున్నారు. తన భార్యపై దాడి జరిగిందనే విషయాన్ని ఆయన ఓ వీడియో ద్వారా వివరించారు. "నా భార్య కొంత స్థలాన్ని లీజ్కు తీసుకుని ఓ షాప్ నడిపిస్తోంది. ఆమెపై 120 మంది పురుషులు దాడి చేశారు. షాప్లోని సామానంతా కిందపడేశారు. నా కుటుంబాన్ని కత్తులతో బెదిరించారు. నా భార్యను అర్ధనగ్నంగా చేసి దారుణంగా కొట్టారు. నేను జిల్లా ఎస్పీకి, డీజీపీకి ఓ పిటిషన్ పంపించాను." అని ఆ వీడియోలో ప్రభాకరన్ చెబుతారు. సామాజిక మాధ్యమాల్లో వైరల్గా మారిన ఈ వీడియోపై సర్వత్రా విమర్శలు వెల్లువెత్తుతున్నాయి. ఘటనపై స్థానిక పోలీసులు కేసు నమోదు చేశారు.
- — Lt Col N Thiagarajan Veteran (@NTR_NationFirst) June 10, 2023 " class="align-text-top noRightClick twitterSection" data="
— Lt Col N Thiagarajan Veteran (@NTR_NationFirst) June 10, 2023
">— Lt Col N Thiagarajan Veteran (@NTR_NationFirst) June 10, 2023
పోలీసులు తెలిపిన వివరాల ప్రకారం.. కుమార్ అనే వ్యక్తికి చెందిన ఓ షాపును.. ప్రభాకరన్ మామ అయిన సెల్వమూర్తి ఐదేళ్ల పాటు లీజుకు తీసుకున్నాడు. ఫిబ్రవరి 10న రూ. 9.5 లక్షలకు ఈ ఒప్పందం కుదిరింది. లీజ్కు తీసుకున్న ఈ షాపు.. రేణుగాంబాల్ ఆలయానికి చెందిన స్థలంలో ఉంది. కాగా ఈ మధ్యకాలంలోనే కుమార్ చనిపోయాడు. దీంతో అతని కుమారుడైన రాము.. షాప్ను తిరిగి ఇచ్చేయాలని సెల్వమూర్తిపై ఒత్తిడి తీసుకువస్తున్నాడు. డబ్బులు తిరిగి ఇచ్చేస్తానని, షాప్ను ఖాళీ చేయాలని బెదిరిస్తున్నాడు.
ఈ గొడవను చూసిన కొంతమంది రాముకు మద్దతుగా నిలిచారని పోలీసులు చెబుతున్నారు. వారెవరూ ప్రభాకరన్ కుటుంబ సభ్యులపై దాడి చేయలేదని అంటున్నారు. తరువాత ఇది పెద్ద గొడవకు దారితీసిందని.. షాప్లో సామాను మొత్తం బయటకు విసిరేసేంత వరకు వెళ్లిందని పోలీసులు పేర్కొన్నారు. ఆ సమయంలో షాప్లో ప్రభాకర్ భార్య, అత్త మాత్రమే ఉన్నారని వారు వివరించారు. ఆ తరువాత ప్రభాకరన్ భార్య ఆసుపత్రిలో చేరిందని వెల్లడించారు.
తన భార్య తీవ్రంగా గాయపడిందని తెలిపిన ప్రభాకరన్.. పోలీసులు తన వాదనలను కొట్టిపారేశారని పేర్కొన్నారు. కాగా తమిళనాడు రాష్ట్ర బీజేపీ అధ్యక్షుడు.. కె అన్నామలై ఆర్మీ జవాన్తో మాట్లాడారు. ఈ విషయంలో జవాన్ కుటుంబానికి అండగా ఉంటామని ఆయన హామీ ఇచ్చారు. వారికి న్యాయం జరిగేలా చూస్తామని తెలిపారు.
నాపై కత్తితో దాడి జరిగింది: రాము
డబ్బును తిరిగి తీసుకునేందుకు సెల్వమూర్తి తిరస్కరించాడని రాము తెలిపాడు. దుకాణాన్ని ఖాళీ చేసేందుకు అతడు నిరాకరించాడని పేర్కొన్నాడు. కాగా జూన్ 10న తాను సెల్వమూర్తి కొడుకులైన జీవా, ఉదయకు డబ్బులు తిరిగి ఇచ్చేందుకు.. షాప్ వద్దకు వెళ్లానని రాము వివరించాడు. కానీ జీవా తనపై కత్తితో దాడి చేశాడని అతడు ఆరోపించాడు.
