ఇంగ్లాండ్ క్రికెటర్లు జానీ బెయిర్స్టో, డొమినిక్ సిబ్లేలపై స్లెడ్జింగ్కు దిగాడు శ్రీలంక వికెట్కీపర్ నిరోషన్ డిక్వెల్లా. రెండో టెస్టులో ఇంగ్లీష్ జట్టు బ్యాటింగ్ చేస్తున్నప్పుడు అతడు నిర్విరామంగా స్లెడ్జ్ చేస్తూనే ఉన్నాడు. ఈ నేపథ్యంలో 'డబ్బుల కోసమే నువ్వు బ్యాటింగ్, క్రికెట్ ఆడతావు' అంటూ బెయిర్స్టోను ఎద్దేవా చేశాడు డిక్వెల్లా.
వచ్చే నెల నుంచి భారత్లో ఇంగ్లాండ్ పర్యటించనుంది. తొలి రెండు టెస్టులకు బెయిర్స్టోకు విశ్రాంతినిచ్చారు. మరోవైపు వచ్చే ఐపీఎల్ కోసం సన్రైజర్స్ హైదరాబాద్ జట్టు అతడిని అట్టిపెట్టుకుంది. దీంతో 'భారత్ పర్యటన నుంచి తప్పుకున్నాడు. కానీ ఐపీఎల్ ఆడతాడు. డబ్బుల కోసమే ఇతడు ఆడతాడు' అని బెయిర్స్టోపై వ్యాఖ్యలు చేశాడు లంక ఆటగాడు.
ఈ మాటల ప్రభావం బెయిర్స్టోపై పడినట్లుగానే ఉంది. ఆ వెంటనే స్లిప్లో ఉన్న క్రికెటర్కి క్యాచ్ ఇచ్చి పెవిలియన్ చేరాడు.
ఇక ఆఖరి ఇన్నింగ్స్లో సిబ్లే జాగ్రత్తగా బ్యాటింగ్ చేస్తున్న సమయంలో.. అతడిని 'భారత పర్యటనలో నీకు జట్టులో చోటుంటుందా?' అని కవ్వించబోయాడు డిక్వెల్లా. అయితే హుందాగా బదులిచ్చాడు సిబ్లే. 'శ్రీలంకలో బ్యాటుకు పెద్దగా పని చెప్పాల్సిరానందున జట్టులో చోటు గురించి కచ్చితంగా చెప్పలేను' అని అన్నాడు.
చివర్లో డిక్వెల్లాకు స్వీట్ వార్నింగ్ ఇచ్చింది ఇంగ్లాండ్ జట్టు. జాగ్రత్తగా బ్యాటింగ్ చేయమని, లేదంటే జట్టు నుంచి తొలగించి కీపింగ్ బాధ్యతలు దినేశ్ చండీమల్కు ఇస్తారని హెచ్చరించింది.
ఇక శ్రీలంకతో జరిగిన రెండు మ్యాచ్ల టెస్టు సిరీస్ను ఇంగ్లాండ్ క్లీన్స్వీప్ చేసింది. సిరీస్ను 2-0 తేడాతో చేజిక్కించుకుంది.
ఇదీ చూడండి: ఆస్ట్రేలియా కెప్టెన్కు అశ్విన్ స్వీట్ వార్నింగ్!
