1999లో అప్పటి ఒడిశా సీఎం జేబీ పట్నాయక్ రాజీనామాకు దారితీసిన సంచలన సామూహిక అత్యాచారం కేసులో ప్రధాన నిందితుడిని పోలీసులు రెండు దశాబ్దాల తర్వాత అరెస్ట్ చేశారు. ఓ ఐఎఫ్ఎస్ అధికారి భార్యతో సంబంధమున్న ఈ కేసులో కీలక నిందితుడైన బిబేకానంద బిశ్వాల్ అలియాస్ బిబాన్.. మహారాష్ట్ర లోనావాలా ప్రాంతంలో పట్టుబడినట్లు అధికారులు వెల్లడించారు. రెండు దశాబ్దాలుగా పరారీలో ఉన్న బిబాన్.. జలంధర్ స్వైన్ పేరుతో నకిలీ గుర్తింపు పత్రాలు సృష్టించి లోనావాలాలో ప్లంబర్గా పని చేస్తున్నాడని తెలిపారు. నిందితుడి అరెస్ట్ చేయడానికి.. మూడునెలల క్రితం 'ఆపరేషన్ సైలెంట్ వైపర్'ను ప్రారంభించినట్లు పేర్కొన్నారు.
ఏం జరిగింది?
1999 జనవరి 9న అర్ధరాత్రి సమయంలో ఓ మహిళా జర్నలిస్ట్ స్నేహితుడితో కలిసి కారులో భువనేశ్వర్ నుంచి కటక్కు వెళ్తుండగా.. బరంగా సమీపంలో ముగ్గురు వ్యక్తులు సామూహిక అత్యాచారానికి పాల్పడ్డారు. ఈ కేసును సీబీఐకి అప్పగించింది ఒడిశా హైకోర్టు.
తనపై అత్యాచారం జరిగిందని వాంగ్మూలం ఇచ్చిన బాధితురాలు.. నిందితులకు మరణశిక్ష విధించాలని డిమాండ్ చేసింది.
ఒడిశాలో తీవ్ర దుమారం రేపిన ఈ కేసులో ముగ్గురు వ్యక్తులు(పాడియా అలియాస్ ప్రదీప్ సాహు, ధీరేంద్ర, బిబాన్) నిందితులుగా ఉన్నారు. వీరిలో తొలుత పాడియా, ధీరేంద్రను పోలీసులు అరెస్ట్ చేయగా.. ఖుర్దా జిల్లా సెషన్స్ కోర్టు వారిని దోషులుగా తేల్చి, జీవిత ఖైదు విధించింది. వారు హైకోర్టులో అప్పీలు చేసుకోగా.. ఈ తీర్పును సమర్థించింది. అయితే పాడియా గతేడాది ఫిబ్రవరి 24న క్యాపిటల్ ఆస్పత్రిలో మృతిచెందినట్టు అధికారులు తెలిపారు.
ఇదీ చూడండి: మద్యం తాగించి యువతిపై గ్యాంగ్ రేప్
