All party meeting: పార్లమెంట్ బడ్జెట్ సమావేశాల నేపథ్యంలో అఖిలపక్షాలతో సమావేశమయ్యారు లోక్సభ స్పీకర్ ఓం బిర్లా. రాష్ట్రపతి ప్రసంగం, బడ్జెట్పై సమగ్ర చర్చకు సహకరించాలని కోరారు. పార్లమెంట్ సజావుగా సాగేందుకు సహకరిస్తామని పార్టీల నేతలు హామీ ఇచ్చినట్లు చెప్పారు.
" ఈ కీలకమైన బడ్జెట్ సమావేశాలు సజావుగా సాగేందుకు సహకరిస్తామని నేతలు భరోసా ఇచ్చారు. రాష్ట్రపతి ప్రసంగం, వార్షిక బడ్జెట్పై విస్తృత చర్చ జరగాలని కూడా వారిని నేను కోరాను. యావత్ దేశానికి సంబంధించిన అంశాలను లేవనెత్తి, చర్చ చేపట్టాలి. "
- ఓం బిర్లా, లోక్సభ స్పీకర్.
రాజ్యసభ ఎంపీలతో వెంకయ్య భేటీ
పార్లమెంట్ బడ్జెట్ సమావేశాలు ప్రారంభమైన నేపథ్యంలో రాజ్యసభకు ప్రాతినిధ్యం వహిస్తున్న 15 పార్టీలు సభ్యులతో వర్చువల్గా సమావేశమయ్యారు ఛైర్మన్ వెంకయ్య నాయుడు. తొలిదశ బడ్జెట్ సెషన్లో ఫిబ్రవరి 11 వరకు శూన్య గంట, ప్రశ్నోత్తరాల సమయం, ప్రైవేటు సభ్యుల సమయం మినహా.. కేవలం 23 గంటల సమయం మాత్రమే ఉందని సూచించారు.
ఈ క్రమంలో సమయాభావం కారణంగా ఈ సెషన్లో శాసన వ్యవహారాలు ఉండవని రాజ్యసభలో అధికారపక్ష నేత పీయూష్ గోయల్ తెలియజేశారు. పలువురు నేతలు సైతం ఇదే విషయాన్ని వెల్లడించారు. ఎలాంటి అడ్డంకులు లేకుండా సభ కొనసాగేలా చూడాలని కోరారు.
పెగసస్పై ప్రత్యేకంగా చర్చ అవసరం లేదు..
పెగసస్ అంశం కోర్టు పరిధిలో ఉన్న కారణంగా ప్రత్యేకంగా చర్చించాల్సిన అవసరం లేదని పేర్కొంది కేంద్రం. పార్లమెంట్ సజావుగా సాగేందుకు పార్టీల మధ్య ఏకాభిప్రాయం కావాలని కోరింది. అయితే, ఏదైనా అంశాన్ని లేవనెత్తాలని విపక్షాలు కోరుకుంటే.. రాష్ట్రపతి ప్రసంగానికి ధన్యవాదాలు తెలిపే సమయంలో చేయొచ్చని స్పష్టం చేశారు పార్లమెంటరీ వ్యవహారాల శాఖ మంత్రి ప్రహ్లాద్ జోషి. పార్లమెంట్ బడ్జెట్ సమావేశాల వేళ 25 పార్టీల నేతలతో వర్చువల్గా అఖిలపక్ష సమావేశం నిర్వహించారు. ప్రభుత్వం తరఫున రక్షణ శాఖ మంత్రి రాజ్నాథ్ సింగ్ హాజరయ్యారు. బడ్జెట్ సెషన్స్ సజావుగా సాగేందుకు కృషి చేయాలని నేతలను కోరారు ఇరువురు నేతలు.
పెగసస్, ఎంఎస్పీ గ్యారంటీ చట్టానికి ఆప్ డిమాండ్..
అఖిలపక్ష పార్టీల సమావేశంలో పెగసస్ స్పైవేర్ అంశాన్ని లేవనెత్తారు ఆమ్ ఆద్మీ పార్టీ ఎంపీ సంజయ్ సింగ్. బడ్జెట్ సెషన్స్లో పెగసస్ స్పైవేర్ అంశంపై చర్చించాలని డిమాండ్ చేశారు. మహాత్మాగాంధీని అవమానించే వారిని నిలువరించాలన్నారు. పంట ఉత్పత్తులకు కనీస మద్దతు ధర కల్పించే చట్టాన్ని తీసుకురావాలని డిమాండ్ చేశారు.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి: 'కేంద్రం నిరంతర ప్రయత్నాల వల్లే అభివృద్ధి పథంలో భారత్'
