సమానత్వం, రక్తదానం మీద అవగాహన కల్పించేందుకు బైక్ యాత్రకు శ్రీకారం చుట్టాడు ఓ యువకుడు. దేశంలోని అనేక రాష్ట్రాలతో పాటు పొరుగు దేశాలైన నేపాల్, భూటాన్లనూ సందర్శిస్తానని చెబుతున్నాడు. అతడే కర్ణాటకలోని శివమొగ్గకు చెందిన విజు వర్గీస్. ఈ భూమిపై ఉన్న మనుషులందరూ ఒక్కటే అనే భావనను తీసుకురావడానికే రాయల్ ఎన్ఫీల్డ్పై బైక్ యాత్రకు సిద్ధమయ్యాడు వర్గీస్.
అన్ని కులాలు, మతాలు ఒకటే అని చాటిచెప్పేందుకు రాయల్ ఎన్ఫీల్డ్పై యాత్రకు సిద్ధమయ్యాడు వర్గీస్. రక్తదానంపై ప్రజల్లో అవగాహన కల్పిస్తానని చెబుతున్నాడు. ఈ బైక్ యాత్ర కోసం తన దగ్గర ఉన్న రాయల్ ఎన్ఫీల్డ్ బైక్ను ఉపయోగించనున్నాడు వర్గీస్. ఈ యాత్ర రెండు నెలల పాటు.. రోజుకు 350 నుంచి 400 కిలోమీటర్ల వరకు ప్రయాణించాలని లక్ష్యంగా పెట్టుకున్నాడు వర్గీస్. కేవలం ప్రాంతాలను సందర్శించడమే కాకుండా అక్కడ మట్టిని సేకరిస్తానని చెబుతున్నాడు. ఆ మట్టిని దేశంలోని ప్రముఖ వ్యక్తులను పంచుతానని తెలిపాడు. ఈ యాత్ర ముఖ్య ఉద్దేశం రక్తదానంపై ప్రజల్లో చైతన్యం తీసుకురావడం, అందరూ సమానమనే భావనను తీసుకురావడమేనని అంటున్నాడు. సోలోగా బైక్ రైడ్ చేయడం తనకు ఇష్టమని అన్నాడు వర్గీస్.
భారత్.. ఆపై నేపాల్, భూటాన్లకు..
ముందుగా కర్ణాటకలోకి హత్తూర్లో యాత్ర ప్రారంభించి తెలంగాణలో పర్యటిస్తాడు. అనంతరం చెన్నై, పుదుచ్చేరి, ధనుష్కోటి, కన్యాకుమారి, కేరళ, మంగళూరు, ఉడుపి, మీదుగా గోవాకి వెళ్తాడు. ఆ తర్వాత రాజస్థాన్, గుజరాత్, హరియాణా, దిల్లీ, ఉత్తరాఖండ్, మహారాష్ట్ర మీదుగా నేపాల్‌లోకి ప్రవేశిస్తాడు. ఆ తర్వాత భూటాన్ నుంచి ఈశాన్య రాష్ట్రాలైన అసోం, మిజోరాం, నాగాలాండ్, మణిపుర్ మీదుగా కర్ణాటకకు తిరిగి చేరుకుంటాడు వర్గీస్.
ప్రత్యేక హంగులతో 'రాయల్' బైక్..
సుదూర ప్రాంతాలకు ప్రయాణించేందుకు అనుగుణంగా తన రాయల్ ఎన్ఫీల్డ్ బైక్ను రూపొందించాడు వర్గీస్. పెట్రోల్ను నిల్వ చేసుకునేందుకు రెండు వేర్వేరు డబ్బాలను బైక్కు అమర్చాడు. తన లగేజీ పెట్టుకునేందుకు ప్రత్యేకంగా ఓ బాక్స్ను తీర్చిదిద్దాడు. మట్టిని నిల్వచేసేందుకు ఓ పెట్టెను అమర్చాడు. ఈ బైక్కు కెమెరాలతో పాటు మొబైల్ పెట్టుకునేందుకు ఏర్పాటు చేశాడు. బైక్ రెండు టైర్ల గాలిని ఎప్పటికప్పుడు తెలుసుకునేందుకు డిజిటల్ సిస్టమ్ సౌలభ్యం ఈ బైక్కు ఉంది. వీటితో పాటు బైక్కు కూలర్ను అమర్చాడు. బైక్ గేర్ను కూడా కుడి నుంచి ఎడమ వైపుకు పెట్టాడు. తొమ్మిది సంవత్సరాల క్రితం విజు వర్గీస్ దక్షిణాది రాష్ట్రాల్లో విజయవంతంగా పర్యటించాడు.
