బంగాల్ అసెంబ్లీ ఎన్నికల వేళ రాజకీయాలు మరింత వేడేక్కుతున్నాయి. కోల్కతాకు పొరుగున ఉన్న దక్షిణ 24 పరగణాల జిల్లాలో కేంద్ర హోంమంత్రి అమిత్ షా, బంగాల్ ముఖ్యమంత్రి మమతా బెనర్జీలు గురువారం ర్యాలీలు నిర్వహించేందుకు సిద్ధమయ్యారు. కొద్ది దూరంలోనే ఇద్దరు ముఖ్యనేతల కార్యక్రమాలతో జిల్లాలో పరిస్థితులు ఉత్కంఠగా మారాయి. గురువారం ఘర్షణల వంటివి తలెత్తే పరిస్థితులు లేకపోలేదని రాజకీయ విశ్లేషకులు భావిస్తున్నారు.
మమతా బెనర్జీ, అమిత్ షాలు ఒకే జిల్లాలో దాదాపు ఒకే సమయంలో ప్రచార కార్యక్రమాలు నిర్వహించటం ఇదే తొలిసారి.
గురువారం నుంచి రెండు రోజుల పాటు బంగాల్లో పర్యటించనున్న కేంద్ర హోంమంత్రి షా.. బుధవారం రాత్రి కోల్కతాకు చేరుకున్నారు. దక్షిణ 24 పరగణాల జిల్లాలోని సాగర్ ద్వీపాల సమీపంలోని కాక్ద్వీప్ను సందర్శించనున్నారు షా. భాజపా ఆధ్వర్యంలో చేపట్టిన ఐదు దశల పరివర్తన్ యాత్రలో చివరి దశను ప్రారంభించనున్నారు. కపిల్ ముని ఆశ్రమాన్ని సందర్శించి.. అక్కడి నుంచి పరివర్తన్ యాత్ర చేపట్టే నంఖానాకు చేరుకుంటారని రాష్ట్ర భాజపా సీనియర్ నేత ఒకరు తెలిపారు. ఇందులో భాగంగానే ఓ వలస కార్మికుడి ఇంట్లో భోజనం చేసి.. రోడ్ షోలో పాల్గొంటారని వెల్లడించారు.
మరోవైపు.. మమతా బెనర్జీ, ఆమె మేనల్లుడు అభిశేక్ బెనర్జీలు దక్షిణ 24 పరగణాల జిల్లాలోని పైలాన్లో గురువారం పార్టీ కార్యకర్తల సమావేశం నిర్వహించనున్నారు.
"రేపు రాజకీయంగా చాలా కీలకమైన రోజు. ఒకే జిల్లాలో అమిత్ షా, దీదీలు ర్యాలీలు నిర్వహిస్తున్నారు. "
- టీఎంసీ సీనియర్ నేత, 24 పరగణాల జిల్లా
2019 సాధారణ ఎన్నికల్లో బంగాల్లోని 42 లోక్సభ స్థానాలకు 18 స్థానాలను కైవసం చేసుకుని అధికార తృణమూల్ కాంగ్రెస్కు ప్రధాన ప్రతిపక్షంగా మారింది భాజపా. ఈ ఎన్నికల్లో టీఎంసీ కేవలం 22 స్థానాలకు పరిమితమైంది. కొద్ది సంవత్సరాలుగా రాష్ట్రంలో భాజపా బలం పుంజుకుంటోంది. ఈ క్రమంలోనే రాష్ట్రంలో మమత పాలనకు శుభం కార్డు పడుతుందని భావిస్తున్నారు నేతలు.
ఇదీ చూడండి: బంగాల్ మంత్రిపై బాంబు దాడి
