కేరళ అసెంబ్లీ ఎన్నికల ఓట్ల లెక్కింపు ప్రక్రియకు సర్వం సిద్ధమైంది. ఆదివారం ఉదయం 8 గంటలకు కౌంటింగ్ ప్రారంభం కానుండగా.. ఇందుకోసం ఎన్నికల సంఘం అన్ని ఏర్పాట్లు పూర్తి చేసింది. మొత్తం 140 అసెంబ్లీ ఎన్నికలకు ఒక విడతలో పోలింగ్ జరగ్గా.. 957మంది ఎన్నికల బరిలో నిలిచారు. గెలుపుపై ప్రధాన కూటములు ఎల్డీఎఫ్- యూడీఎఫ్ ధీమాగా ఉన్నాయి.
కేరళ సమరం
- మొత్తం సీట్లు: 140
- మ్యాజిక్ ఫిగర్:
- పోలింగ్: ఏప్రిల్ 6
- ప్రధాన పోటీ: ఎల్డీఎఫ్ X యూడీఎఫ్
కరోనా వేళ...
దేశంలో కరోనా విజృంభిస్తున్న వేళ.. కౌంటింగ్ ప్రక్రియను ప్రతిష్టాత్మకంగా తీసుకుంది ఈసీ. ఇందుకోసం కేరళవ్యాప్తంగా అన్ని ఏర్పాట్లు పూర్తి చేసింది. ఫేస్ షీల్డ్స్, మాస్కుల పంపిణీ, శానిటైజేషన్ ప్రక్రియను ముమ్మరం చేసింది.
మొత్తం మీద 114 కేంద్రాల్లో.. 24వేల మంది పోలింగ్ సిబ్బంది, 30,281మంది పోలీసు సిబ్బంది, 3,332మంది కేంద్ర బలగాల సిబ్బందిని ప్రత్యేకంగా నియమించింది ఈసీ.
ఇదీ చూడండి:- విజయన్ చరిత్ర సృష్టిస్తారా?
కౌంటింగ్ కేంద్రాలకు వెళ్లే అభ్యర్థులు, వారి ఏజెంట్లు.. కచ్చితంగా కరోనా నెగిటివ్ రిపోర్టును చూపించాలి. లేదా టీకా రెండు డోసులు తీసుకున్నట్టు ధ్రువపత్రాలను సమర్పించాలి.
అదే సమయంలో.. కౌంటింగ్ కేంద్రాల బయట ప్రజలు గుమిగూడకుండా చర్యలు చేపట్టింది ఈసీ. నిబంధనలు ఉల్లంఘించే వారిపై కఠిన చర్యలు తప్పని స్పష్టం చేసింది.
ఎల్డీఎఫ్ రిపీట్?
ఒక పార్టీ వరుసగా రెండోసారి అధికారం చేజిక్కించుకోవడం కేరళలో ఓ కల. కానీ ఈసారి.. పినరయి విజయన్ నేతృత్వంలోని ఎల్డీఎఫ్ తిరిగి అధికారాన్ని సాధిస్తుందని ఎగ్జిట్ పోల్స్ అంచనా వేశాయి. దీనిపై పినరయి వర్గం హర్షం వ్యక్తం చేస్తోంది. అయితే ఎగ్జిట్ పోల్స్ను తాము నమ్మడం లేదని.. ప్రజలు తమవైపే ఉన్నారని యూడీఎఫ్ తేల్చిచెబుతోంది. ఈ దఫా ఎన్నికల్లో విజయం తమనే వరిస్తుందని ధీమాగా ఉంది. ఈ నేపథ్యంలో ప్రజలు ఎవరికి పట్టంగడతారన్నది సర్వత్రా ఆసక్తిగా మారింది.
ఇదీ చూడండి:- ఎన్నికల్లో.. కమల బలమా? విపక్ష గళమా?
