Home Quarantine: దేశంలో కరోనా కేసులు శరవేగంగా విస్తరిస్తున్న నేపథ్యంలో కేంద్రం అంతర్జాతీయ ప్రయాణాలపై ఆంక్షలను కట్టుదిట్టం చేస్తోంది. విదేశాల నుంచి భారత్కు వచ్చే ప్రయాణికులు అందరికీ 7 రోజుల పాటు హోం క్వారంటైన్ను తప్పనిసరి చేస్తూ ఆదేశాలు జారీ చేసింది. ఈనెల 11న ఈ ఆదేశాలు అమలోకి వస్తాయని స్పష్టం చేసింది.
ఆ దేశాల నుంచి వస్తే..
ఆందోళనకర స్థాయిలో కరోనా వ్యాప్తి ఉన్న దేశాల నుంచి వచ్చే ప్రయాణికులపై కేంద్రం దృష్టి సారించింది. ఆ దేశాల నుంచి వచ్చే ప్రయాణికులు కొవిడ్ టెస్టులు తప్పనిసరి చేసింది. ఫలితాల్లో నెగటివ్ వస్తే వారు ఏడు రోజుల పాటు హోంక్వారంటైన్లో ఉండాల్సి ఉంటుంది. ఎనిమిదవ రోజు మరోసారి టెస్ట్ చేయించుకోవాలి. ఆ ఫలితాలను ప్రయాణికులు ఎయిర్ సువిధా పోర్టల్లో అప్లోడ్ చేయాలి. టెస్ట్లో నెగటివ్ వస్తే 7 రోజుల పాటు స్వీయ పర్యవేక్షణలో ఉండాలి. ఒకవేళ పాజిటివ్ వస్తే అధికారులు వారిని ఐసోలేషన్కు తరలించి చికిత్స అందిస్తారు.
రిస్క్ దేశాల జాబితాను కూడా కేంద్రం విడుదల చేసింది. వీటిలో ఐరోపా దేశాలు సహా దక్షిణాఫ్రికా, బ్రెజిల్, చైనా వంటి దేశాలు ఉన్నాయి. ఇతర ప్రాంతాల నుంచి వచ్చిన వారికి కూడా ఈ ఆంక్షలు వర్తిస్తాయని కేంద్రం స్పష్టం చేసింది. రోడ్డు, సముద్ర మార్గాల ద్వారా వచ్చే ప్రయాణికులు కూడా ఈ నిబంధనలను అనుసరించాలని తెలిపింది.
ఇదీ చూడండి : 'పంజాబ్ ఇష్యూ'పై భాజపా నయా గేమ్ప్లాన్.. టార్గెట్ కాంగ్రెస్!
