నిబంధనలకు విరుద్ధంగా ఓ పైలట్ విమానంలోని కాక్పిట్లోకి స్నేహితురాలిని అనుమతించిన ఘటనపై పౌరవిమానయాన డైరెక్టర్‌ జనరల్-DGCA విచారణకు ఆదేశించింది. ఫిబ్రవరి 27న దుబాయి నుంచి దిల్లీకి వస్తున్న ఎయిరిండియా విమానంలో జరిగిన ఘటన ఆలస్యంగా వెలుగుచూసింది. విమానంలో ప్రయాణికురాలిగా ఉన్న ఓ మహిళ తనకు స్నేహితురాలు కావడంతో పైలట్ ఆమెను కాక్పిట్లోకి అనుమతించాడు. దాదాపు 3 గంటలపాటు ఆ మహిళ కాక్‌పిట్‌లోనే ప్రయాణించినట్లు తెలిపారు.
ఈ ఘటనను తీవ్రంగా పరిగణించిన DGCA.. దర్యాప్తునకు ఆదేశించింది. ఈ సంఘటన భద్రతా నియమాలను ఉల్లంఘించడమేనని.. DGCA అధికారి ఒకరు తెలిపారు. విమానం, అందులోని ప్రయాణికుల భద్రతను పట్టించుకోకుండా.. పైలట్ చేసిన పనికి అతని సస్పెన్షన్ లేదా లైసెన్స్‌ రద్దు చేసే అవకాశం ఉందని పేర్కొన్నారు.
ఘటనను తాము సీరియస్గా తీసుకున్నామని ఎయిర్ ఇండియా వెల్లడించింది. సంస్థ పరిధిలో దీనిపై విచారణ జరుగుతోందని తెలిపింది. దీనిపై డీసీజీఐకు రిపోర్ట్ చేశామని.. దర్యాప్తులో వారికి పూర్తిగా సహకరిస్తామని పేర్కొంది. ఎయిర్ ఇండియా ఫ్లైట్ నంబర్ AI-915లో ఈ ఘటన జరిగింది. ప్రయాణికుల భద్రతకు సంబంధించిన అంశాలలో విమానయాన సంస్థకు ఎలాంటి రాజీ ఉండదని ఎయిర్ ఇండియా ప్రతినిధి తెలిపారు. పైలట్పై అవసరమైన చర్యలు తీసుకుంటామన్నారు. దర్యాప్తు బృందం సాంకేతిక, భద్రత కోణంలో వాస్తవాలను పరిశీలిస్తుందని ఆయన వెల్లడించారు.
"మహిళ ప్రయాణికురాలు కాక్పిట్లోకి వెళ్లిన వెంటనే ఆమె సౌకర్యం కోసం.. కొన్ని దిండ్లు తీసుకురమ్మని కెప్టెన్ (పైలట్) నాకు చెప్పారు. కాక్పిట్ రూంలో వెచ్చగా, సౌకర్యవంతంగా ఉంటుందని అందుకే.. ఆమె కోసం లివింగ్ రూం సిద్ధం చేస్తున్నానని పైలట్ చెప్పారు. దాంతో పాటు ఆమెకు డ్రింక్స్, స్నాక్స్ ఆర్డర్ ఇవ్వమని నన్ను అడిగారు" అని ఘటన సమయంలో విమానంలో పనిచేసిన మహిళ హోస్ట్ తెలిపారు.
ఎయిర్ ఇండియా చీఫ్ ఎగ్జిక్యూటివ్ ఆఫీసర్ క్యాంప్‌బెల్ విల్సన్.. పైలట్పై డీజీసీఏకి ఫిర్యాదు చేశారు. POSH(లైంగిక వేధింపుల ఫిర్యాదుల నివారణ), పౌర విమానయాన నిబంధనలు, ఎయిర్ సేఫ్టీ నిబంధనలను పైలట్ ఉల్లంగించాడని ఫిర్యాదులో పేర్కొన్నారు. సాధారణంగా అనధికారమైన వ్యక్తులకు కాక్పిట్లోకి ప్రవేశం ఉండదు. అయినా పైలట్ తన స్నేహితులరాలి కాక్పిట్లోకి అనుమతించాడు. దీంతో డీసీజీఏ చర్యలకు ఆదేశించింది.
మంచి నిద్రలో పైలట్లు 37 వేల అడుగుల ఎత్తులో విమానం చక్కర్లు..
విమానం 37 వేల అడుగుల ఎత్తులో ప్రయాణిస్తుండగా అందులోని ఇద్దరు పైలట్లూ ఆదమరిచి నిద్రపోయారు. గతేడాది ఆగస్టులో ఈ ఘటన జరిగింది. ఈఏకు చెందిన బోయింగ్‌ 737 విమానం సూడాన్‌ నుంచి ఇథియోపియా రాజధాని ఆడిస్‌ అబాబాకు ప్రయాణమైంది. కొద్దిసేపటి తర్వాత పైలట్లు లోహవిహంగాన్ని ఆటోపైలట్‌ మోడ్‌లో ఉంచారు. ఆపై వారిద్దరూ నిద్రలోకి జారుకున్నారు. ఆ తర్వాత ఏమైందో తెలియాలంటే ఇక్కడ క్లిక్ చేయండి.
