Omicron India News: ఒమిక్రాన్పై సర్వత్రా భయాందోళనలు నెలకొన్న తరుణంలో ఎయిమ్స్ చీఫ్ డా. రణ్దీప్ గులేరియా కీలక వ్యాఖ్యలు చేశారు. కొత్త వేరియంట్ స్పైక్ ప్రోటీన్లో 30కిపైగా మ్యుటేషన్లు ఉన్నాయని తెలిపారు. దీంతో రోగనిరోధక శక్తి నుంచి తప్పించుకునే సామర్థ్యం వైరస్కు లభిస్తుందని పేర్కొన్నారు.
ఈ స్పైక్ ప్రోటీన్లే.. రోగి కణాల్లోకి చొచ్చుకెళ్లి, వైరస్ వ్యాప్తికి కారణమవుతాయి. స్పైక్ ప్రోటీన్ శక్తిని తగ్గించేందుకు చాలా టీకాలు యాంటీబాడీలను ఉత్పత్తి చేస్తాయి. స్పైక్ ప్రోటీన్లలో మ్యుటేషన్లు పెరిగిపోతే.. టీకాల సామర్థ్యం తగ్గిపోతుంది. అందువల్ల ఒమిక్రాన్పై ప్రస్తుత వ్యాక్సిన్ల సామర్థ్యాన్ని పరిశీలించాల్సిన అవసరం ఉందని గులేరియా స్పష్టం చేశారు.
వైరస్ వ్యాప్తి, రోగనిరోధక శక్తిపై కొత్త వేరియంట్ పోరాడే తీరుపైనే భవిష్యత్ కార్యాచరణ ఆధారపడి ఉంటుందని తెలిపారు గులేరియా. ప్రస్తుతానికి ఒమిక్రాన్ వేరియంట్ను భారత్లో గుర్తించలేదని, ఐఎన్ఎస్ఏసీఓజీ తాజా పరిస్థితులను పర్యవేక్షిస్తోందని స్పష్టం చేశారు. అయితే అంతర్జాతీయ ప్రయాణికులు, ముఖ్యంగా కొవిడ్ కేసులు అనూహ్యంగా పెరిగిన దేశాల నుంచి వచ్చే ప్రజలతో జాగ్రత్తగా ఉండాలని హెచ్చరించారు. కొవిడ్ నిబంధనలు కచ్చితంగా పాటించాలని సూచించారు.
కేంద్రం అప్రమత్తం...
ఈ కొత్త వేరియంట్ను దక్షిణాఫ్రికాలో తొలుత గుర్తించారు. దీని తీవ్రత, వ్యాప్తి ఎక్కువగా ఉందని వైద్యనిపుణులు చెప్పారు. ఈ వేరియంట్కు ఒమిక్రాన్ అని పేరు పెట్టింది డబ్ల్యూహెచ్ఓ. ఒమిక్రాన్ కట్టడికి ఇప్పటికే అనేక దేశాలు చర్యలు చేపట్టాయి. వైరస్ ఉద్ధృతి తీవ్రంగా ఉన్న దేశాల నుంచి వచ్చే ప్రయాణికులపై ఆంక్షలు విధిస్తున్నాయి.
తాజా పరిస్థితులను తీవ్రంగా పరిగణించిన భారత ప్రభుత్వం.. అందుకు తగ్గట్టుగా సన్నద్ధమవుతోంది. వైరస్ నియంత్రణ కోసం విస్త్రతంగా సన్నద్ధమవ్వాలని, కట్టడి చర్యలను ఎప్పటికప్పుడు పర్యవేక్షించాలని అన్ని రాష్ట్రాలు, కేంద్రపాలిత ప్రాంతాలకు కేంద్రం సూచించింది(india omicron variant). ఈ మేరకు కేంద్ర ఆరోగ్యశాఖ కార్యదర్శి రాజేశ్ భూషణ్.. ఆయా ప్రభుత్వాలకు ఆదివారం లేఖ రాశారు. టీకా పంపిణీని మరింత వేగవంతం చేయాలని లేఖలో పేర్కొన్నారు.
రాష్ట్రాలు కూడా ఇప్పటికే చర్యలు మొదలుపెట్టాయి. విదేశాల నుంచి మహారాష్ట్రలోకి వచ్చే ప్రయాణికులు తప్పనిసరిగా పూర్తిస్థాయిలో వ్యాక్సిన్ వేయించుకోవాలని లేదా 72 గంటల ముందు ఆర్టీ-పీసీఆర్ పరీక్షలు చేయించుకోవాలని ఆ రాష్ట్ర ప్రభుత్వం స్పష్టం చేసింది. ఈ మేరకు నూతన మార్గదర్శకాలు(Maharashtra new covid guidelines today) జారీ చేసింది. దక్షిణాఫ్రికా నుంచి ముంబయికి(Mumbai omicron) వచ్చేవారు తప్పనిసరిగా క్వారంటైన్లో ఉండాలని... ముంబయి మేయర్ కిషోరి పెడ్నేకర్ స్పష్టం చేశారు. వారి నుంచి రక్తనమూనాలు తీసుకుని.. జీనోమ్ సీక్వెన్సింగ్ కోసం ల్యాబ్లకు పంపిస్తామని తెలిపారు.
ఇవీ చూడండి:-
