AFSPA states: సాయుధ దళాల ప్రత్యేక అధికారాల చట్టం(ఏఎఫ్ఎస్పీఏ) పరిధిలోని కల్లోలిత ప్రాంతాలను కుదించాలని కేంద్ర ప్రభుత్వం నిర్ణయించింది. దశాబ్దాల తర్వాత నాగాలాండ్, అసోం, మణిపుర్ రాష్ట్రాల్లో ఏఎఫ్ఎస్పీఏ పరిధిని తగ్గిస్తున్నట్లు కేంద్ర హోంశాఖ మంత్రి అమిత్ షా తెలిపారు. అయితే ఏఎఫ్ఎస్పీఏ చట్టాన్ని పూర్తిగా ఎత్తివేయలేదని, పలు ప్రాంతాల్లో కొనసాగుతుందన్నారు. ప్రధాని మోదీ సారథ్యంలోని కేంద్ర ప్రభుత్వం ఈ మేరకు నిర్ణయం తీసుకుందని వరుస ట్వీట్లు చేశారు షా.
" దశాబ్దాలుగా వివక్షకు గురవుతున్న ఈశాన్య రాష్ట్రాల్లో శాంతి, శ్రేయస్సు, అభివృద్ధి కోసం కట్టుబడి ఉన్న ప్రధాన మంత్రి నరేంద్ర మోదీకి కృతజ్ఞతలు. ఈ తరుణంలో ఈశాన్య రాష్ట్రాల ప్రజలకు అభినందనలు తెలియజేస్తున్నా. ఈశాన్య రాష్ట్రాల్లో శాంతి, చొరబాట్లకు ముగింపు పలికేందుకు పీఎం మోదీ ప్రభుత్వం తీసుకున్న చర్యలతో భద్రతా పరిస్థితులు మెరుగుపడ్డాయి. ఆయా రాష్ట్రాల్లో వేగంగా అభివృద్ధి జరుగుతోంది. వాటి ఫలితమే ఏఎఫ్ఎస్పీఏ పరిధిలోని ప్రాంతాల కుదింపు. "
- అమిత్ షా, కేంద్ర హోంమంత్రి.
ఈశాన్య ప్రాంతంలో తిరుగుబాట్లను అణిచివేసేందుకు సైన్యానికి కేంద్ర ప్రభుత్వం ప్రత్యేక అధికారాలు కల్పించింది. అయితే ఈ చట్టాన్ని సైన్యం దుర్వినియోగం చేస్తోందనే ఆరోపణలు ఉన్నాయి. ఏఎఫ్ఎస్పీఏ పరిధిలోని కల్లోలిత ప్రాంతాలను పూర్తి స్థాయిలో.. త్రిపురలో 2015, మేఘాలయలో 2018లో తొలగించింది కేంద్రం. 1990 నుంచి అసోంలో ఈ చట్టాన్ని అమలు చేశారు. అయితే.. పరిస్థితులు మెరుగుపడుతున్న క్రమంలో ఈ ఏడాది ఏప్రిల్ 1 నుంచి 23 జిల్లాల్లో పూర్తిస్థాయిలో, ఒక జిల్లాలో పాక్షికంగా తొలగిస్తున్నారు. మణిపుర్లో ఇంపాల్ మున్సిపాలిటీ ప్రాంతం మినహా మిగతా వాటిల్లో 2004 నుంచి ఈ చట్టాన్ని అమల్లోకి తెచ్చారు. గురువారం తీసుకున్న నిర్ణయంతో ఆరు జిల్లాల్లోని 15 పోలీస్ స్టేషన్ల పరిధిలోని ప్రాంతాలను ఈ చట్టం పరిధిని నుంచి తొలగిస్తున్నారు. నాగాలాండ్లో 7 జిల్లాల్లోని 15 పోలీస్ స్టేషన్ పరిధిలోని ప్రాంతాల్లో ఈ చట్టాన్ని ఎత్తివేస్తున్నారు.
ఇదీ చూడండి: 75 ఏళ్ల సూపర్ ఉమన్.. 10వేల కిలోమీటర్లు సైకిల్పైనే సవారీ
