పేదరికం కారణంగా.. పది రోజుల వయసు ఉన్న ఓ పసికందును కన్న తల్లిదండ్రులే అమ్మేశారు. ఒడిశా భువనేశ్వర్లోని మాలిసాహి ప్రాంతంలో ఈ ఘటన జరిగింది. రూ.10,000 కోసం ఆ తల్లిదండ్రులు తమ కుమారుడిని విక్రయించారని పోలీసులు తెలిపారు. జూన్ 14న జరిగిన ఈ ఘటన.. శుక్రవారం వెలుగులోకి వచ్చింది.
నవజాత శిశువును కొనుగోలు చేసిన మహిళను పోలీసులు అదుపులోకి తీసుకున్నారు. సదరు మహిళను సమేదిన్ బీబీగా అధికారులు గుర్తించారు. చిన్నారిని కొనుగోలు చేసేందుకు తాను డబ్బులు చెల్లినట్లు సమేదిన్ ఒప్పుకుంది.
అనంతరం.. ఆ పసికందును పిల్లల సంరక్షణ కమిటీ(సీడబ్ల్యూసీ)కి అప్పగించారు అధికారులు. శిశువు అమ్మకానికి సంబంధించిన వీడియోను ఓ ఎన్జీవో తమకు పంపించగా.. పోలీసులతో కలిసి ఈ రెస్క్యూ నిర్వహించామని చైల్డ్లైన్ అధికారి బేనూదర్ సేనాపతి తెలిపారు. పేదరికం వల్లే ఆ తల్లిదండ్రులు తమ శిశువును విక్రయించారని చెప్పారు. ప్రస్తుతం ఆ దంపతులు తమ నివాస ప్రాంతాన్ని విడిచి వెళ్లిపోయారని పేర్కొన్నారు. వారిని వెతికే పనిలో ఉన్నట్లు వివరించారు.
ఇదీ చూడండి: కుమార్తె చదువుకై.. తాను తడుస్తూ..
ఇదీ చూడండి: International Fathers day: తండ్రి అయ్యాకే తెలుస్తుంది.. నాన్న అంటే ఏమిటో..!
