మత్తుపదార్థాల అక్రమ రవాణా కేసులో భాగంగా ఉగాండాకు చెందిన ఓ మహిళను ముంబయిలోని అంతర్జాతీయ విమానాశ్రయంలో అరెస్ట్ చేశారు మాదకద్రవ్యాల నియంత్రణ సంస్థ అధికారులు. ఆమె కడుపులో 535 గ్రాముల 49 హెరాయిన్ క్యాప్సుల్స్, 174 గ్రాముల 15 కొకైన్ క్యాప్సుల్స్ను గుర్తించి.. బయటకు తీశారు. వాటి విలువ అంతర్జాతీయ మార్కెట్లో రూ.3 కోట్లకుపైనే ఉంటుందని తెలిపారు.
ఉగాండా నుంచి వస్తున్న మహిళ అనుమానాస్పదంగా ఉందన్న పక్కా సమాచారంతో మే 28న ప్రత్యేక ఆపరేషన్ నిర్వహించారు అధికారులు. ముంబయి విమానాశ్రయంలో దిగగానే అదుపులోకి తీసుకుని విచారించారు. ఆమె లగేజీని తనిఖీ చేయగా ఎలాంటి అనుమానాస్పద వస్తువులు లభించలేదు. క్యాప్సుల్స్ రూపంలో డ్రగ్స్ను శరీరంలో దాచి తీసుకురావచ్చనే అనుమానంతో తమదైన శైలిలో విచారించారు. దాంతో 11 క్యాప్సుల్స్లో మింగినట్లు అంగీకరించింది. 110 గ్రాముల 10 హెరాయిన్ క్యాప్సుల్స్ను వెలికితీశారు. అనంతరం మిగిలిన వాటిని తీసేందుకు మహిళను బెకుల్లాలోని జేజే ఆసుపత్రికి తరలించారు.
ఆసుపత్రిలో.. మొత్తంగా ఆమె పొట్టలోంచి 54 క్యాప్సుల్స్ బయటకు తీశారు వైద్యులు. అందులో 425 గ్రాముల 39 హెరాయిన్ క్యాప్సుల్స్, 175 గ్రాముల 15 కొకైన్ క్యాప్సుల్స్ ఉన్నాయి. పట్టుబడిన రోజు తీసిన 10 క్యాప్సుల్స్ కలుపుకొని మొత్తం 64 డ్రగ్స్ క్యాప్సుల్స్ను స్వాధీనం చేసుకున్నారు అధికారులు. మహిళను ఆసుపత్రి నుంచి డిశ్చార్జ్ చేసి ఎన్సీబీ ఆఫీస్కు తరలించారు. ఈ డ్రగ్స్ అక్రమ రవాణాలో ఎవరెవరున్నారనే అంశంపై దర్యాప్తు చేపట్టారు.
ఇదీ చూడండి: 'వీడొక్కడే' సీన్ రిపీట్- కడుపులో హెరాయిన్ క్యాప్సుల్స్తో..
