సుమారు రూ.2 కోట్ల విలువైన యాంబర్గ్రీస్ను అక్రమంగా తరలిస్తున్న ఆరుగురిని పోలీసులు అరెస్టు చేశారు. ఈ ఘటన తమిళనాడు, తుత్తుకుడి జిల్లాలోని తిరుచేందురు పట్టణంలో జరిగింది.
అక్రమ తరలింపుపై ముందే సమాచారం అందుకున్న పోలీసులు జిల్లాలో భద్రతను కట్టుదిట్టం చేశారు. వాహన తనిఖీలు విస్తృతంగా చేపట్టారు. తిరుచేందురు పట్టణంలో ఓ కారును తనిఖీ చేయగా .. రూ.2 కోట్ల విలువ చేసే యాంబర్గ్రీస్ను స్వాధీనం చేసుకున్నారు. ఆరుగురిని అరెస్టు చేశారు.
ఏంటి యాంబర్ గ్రీస్..?
యాంబర్ గ్రీస్ అనేది రాయిలా ఉండే ఓ ఘన పదార్థం. సముద్రంలో ఉండే తిమింగలాలు ఒక చోటు నుంచి మరొక ప్రాంతానికి వెళ్తుంటాయి. ఆ సమయంలో ఆహారంగా రకరకాల చేపలు, సముద్ర జంతువులను తింటూ ఉంటాయి. అలా తిమింగలాలు తిన్న ఆహారం కొన్ని సార్లు జీర్ణం కాదు. అది కొన్ని ఏళ్ల పాటు కడుపులోనే ఉండి పోతుంది. ఎప్పుడైనా ఓ సారి దానిని తిమింగలాలు వాంతి చేసుకుంటాయి. ఇలా అది బయటకు వస్తుంది అని మెరైన్ బయోలాజికల్ స్టడీస్ సెంటర్ అసిస్టెంట్ ప్రొఫెసర్ డాక్టర్ శివకుమార్ వివరించారు. దీన్ని అగ్నితో వేడి చేస్తే మొదట భరించలేని వాసన వస్తుందని తెలిపారు. ఆపై ఇది సువాసనలు వెదజల్లుతుందని పేర్కొన్నారు. దీనిని సుగంధాల తయారీ ఉపయోగిస్తారని చెప్పిన ఆయన.. ఖరీదు కూడా ఎక్కువగా ఉంటుందని వివరించారు.
