హైవేలపై వెళ్లే భార్యాభర్తలే వారి లక్ష్యం. నిర్మానుష్యంగా, చికటిమయంగా ఉండే ప్రాంతాలను ఎంచుకుని వారిపై దాడి చేసి.. మహిళలపై అఘాయిత్యాలకు పాల్పడుతున్నారు. ప్రతి 15 రోజులకు ఓ చోట ఈ విధంగా దుశ్చర్యలకు పాల్పడుతున్నట్లు తెలుసుకుని పోలీసులే నిర్ఘాంతపోయారు. ఈ ఘటన రాజస్థాన్లోని ప్రతాప్గఢ్ జిల్లాలో జరిగింది. ఈ ముఠాకు చెందిన ఐదుగురుని పట్టుకుని విచారించగా విస్తుపోయే నిజాలు బయటపడినట్లు చెప్పారు పోలీసులు. అరెస్టయిన వారి నుంచి గ్యాంగ్ రేప్లకు సంబంధించిన ఆరు వీడియోలను స్వాధీనం చేసుకున్నారు.
" ప్రతి 10-15 రోజులకు ఓసారి చీకటిగా ఉండే రహదారులను ఎంచుకుని నేరాలకు పాల్పడుతున్నారు. వీడియోల ఆధారంగా వారు సామూహిక అత్యాచారాలకు పాల్పడుతున్నట్లు స్పష్టంగా తెలుస్తోంది. ఈ గ్యాంగ్లో 8 మంది ఉన్నారు. అందులో ఎక్కువ మంది 20 ఏళ్లలోపు వారే. వారు కిడ్నాప్లు, దోపిడీలకు సైతం పాల్పడుతున్నారు. అరెస్టయిన ఐదుగురిలో ఒకరు మైనర్. పలువురు బాలికలపై గ్యాంగ్ రేప్కు పాల్పడిన వీడియోలను పోలీసులు స్వాధీనం చేసుకున్నారు. ఓ గిరిజన బాలికపై సామూహిక అత్యాచారానికి పాల్పడుతూ తీసిన వీడియో సైతం అందులో ఉంది. ఈ కేసులో నిందితులను గుర్తించి అరెస్టు చేస్తున్నాం."
- అమ్రిత్ దుహాన్, ప్రతాప్గఢ్ ఎస్పీ.
ఓ పెట్రోల్ పంప్లో దోపిడి చేయాలని ప్రణాళిక వేస్తున్నట్లు అందిన సమాచారం మేరకు నగరంలోని ఓ పాడుబడిన ఇంటిపై దాడి చేశారు పోలీసులు. పోలీసుల రాకను గమనించిన ముగ్గురు పరారవగా.. మిగిలిన ఐదుగురిని అరెస్ట్ చేశారు. వీరి నుంచి కారంపొడి, ఇనుప రాడ్లు, రెండు లాఠీలు, ఓ ఖడ్గం, కత్తి, నైలాన్ తాడు, రెండు మోటర్ సైకిళ్లను స్వాధీనం చేసుకున్నారు పోలీసులు.
అరెస్టయిన నిందితులు పుస్కర్ కీర్, పలియా మీనా, ఇద్దరు దీపక్లు సహా ఓ మైనర్ని గుర్తించారు. ఈ ముఠాలోని ఎనిమిది మందికి క్రిమినల్ చరిత్ర ఉన్నట్లు చెప్పారు పోలీసులు. 'జిల్లాలోని ధరియావాడ్లో కూరగాయల విక్రయం సహా చిన్న చిన్న పనులు చేస్తూ జీవిస్తున్నారు. మద్యానికి బానిసలై 10-15 రోజులకు ఓసారి గ్యాంగ్ రేప్ ప్రణాళిక చేస్తున్నారు. రోడ్డుపై బైక్లను పార్క్ చేసి తమ టార్గెట్ల కోసం వేచి చూస్తారు. ముఖ్యంగా భార్యాభర్తలను లక్ష్యంగా చేసుకుంటారు' అని పోలీసులు తెలిపారు. భార్యాభర్తలు కనిపిస్తే.. భర్తపై దాడి చేసి.. అతని భార్యను అపహరించి అత్యాచారానికి పాల్పడతారని చెప్పారు. వీడియోలు తీసి ఎవరికైనా చెబితే వైరల్ చేస్తామని బెదిరిస్తారని పేర్కొన్నారు.
ఇదీ చూడండి: 16 ఏళ్ల బాలికపై రెండేళ్లుగా తండ్రి, అన్న లైంగిక దాడి
