Reservation for transgenders: లింగ వివక్షతను రూపుమాపేలా కర్ణాటక ప్రభుత్వం కీలక నిర్ణయం తీసుకుంది. కర్ణాటక స్టేట్ రిజర్వ్ పోలీస్(కేఎస్ఆర్పీ), ఇండియన్ రిజర్వ్ బెటాలియన్లో (ఐఆర్బీ) స్పెషల్ రిజర్వ్ సబ్- ఇన్స్పెక్టర్ పోస్టులకుగాను మహిళలు, పురుషులతో పాటు ట్రాన్స్జెండర్లూ దరఖాస్తు చేసుకునేందుకు అవకాశం కల్పించింది. ఈ ఉద్యోగాల్లో ట్రాన్స్జెండర్లకు ఒక శాతం రిజర్వేషన్ కల్పిస్తున్నట్లు ప్రకటించింది.
Transgenders in karnataka police: కర్ణాటక రాష్ట్ర పోలీసు శాఖలో ఉద్యోగాలకు సంబంధించి సోమవారం ఆ రాష్ట్ర ప్రభుత్వం నోటిఫికేషన్ విడుదల చేసింది. 70 ఖాళీలు ఉన్న ఉద్యోగాల కోసం దరఖాస్తు చేసుకునేందుకు అభ్యర్థులకు జనవరి 18 వరకు గడువు ఇస్తున్నట్లు తెలిపింది. ఈ ఉద్యోగాల్లో ట్రాన్స్జెండర్లు ఒక శాతం రిజర్వేషన్ పొందుతారని స్పష్టం చేసింది.
అయితే.. ఈ ఉద్యోగం కోసం దరఖాస్తు చేసుకునే సమయంలో ట్రాన్స్జెండర్ అభ్యర్థులు జిల్లా కలెక్టర్ జారీ చేసిన 'ట్రాన్స్జెండర్ సర్టిఫికెట్'ను సమర్పించాల్సి ఉంటుంది. లేదంటే.. వారి దరఖాస్తును తిరస్కరిస్తారు. "కర్ణాటక రాష్ట్ర పోలీసు శాఖ అందరికీ సమాన అవకాశాలు కల్పిస్తోంది. మేము మహిళలు, పురుషులను, ట్రాన్స్జెండర్లను పోలీసు ఉద్యోగాల్లో నియమించుకుంటాం" అని ట్విట్టర్ వేదికగా కర్ణాటక డీజీపీ ప్రవీణ్ పేర్కొన్నారు.
దేశంలోనే మొదటి రాష్ట్రం..
First state for transgender reservations: ట్రాన్స్జెండర్లకు రిజర్వేషన్ కల్పించాలని కోరుతూ.. 'సంగమ' అనే స్వచ్ఛంద సంస్థ, సామాజిక కార్యకర్త నీషా గులార్.. కర్ణాటక హైకోర్టులో ప్రజాప్రయోజన వ్యాజ్యాన్ని(పీఐఎల్) దాఖలు చేశారు. దీనిపై విచారణ జరిపిన న్యాయస్థానం.. ట్రాన్స్జెండర్లకు అన్నిరంగాల్లో ఒక శాతం రిజర్వేషన్ కల్పించాలని కర్ణాటక ప్రభుత్వాన్ని ఈ ఏడాది జులై 20న ఆదేశించింది. ఈ నేపథ్యంలో కర్ణాటక పోలీసు శాఖ ప్రస్తుతం ఎస్ఐ ఉద్యోగాల్లో ట్రాన్స్జెండర్లకు రిజర్వేషన్ కల్పిస్తున్నట్లు ప్రకటించింది. దీంతో దేశంలోనే.. ప్రభుత్వ సర్వీసుల్లో ట్రాన్స్జెండర్లకు రిజర్వేషన్ కల్పించనున్న మొదటి రాష్ట్రంగా కర్ణాటక నిలిచింది.
ట్రాన్స్జెండర్ల హర్షం..
"కర్ణాటక పోలీసు శాఖ నిర్ణయాన్ని మేం స్వాగతిస్తున్నాం. అంతకుముందు మాకు ఎలాంటి సదుపాయాలు ఉండేవి కావు. కానీ, ఇప్పుడు ఒక్కొక్కటిగా మేం అన్నింటిని పొందుతున్నాం. నేను ఎంఏ జర్నలిజం పూర్తి చేశాను. పోలీసు శాఖలో చేరేందుకు నేను కూడా ఈ ఉద్యోగానికి దరఖాస్తు చేస్తాను" అని ఓ ట్రాన్స్జెండర్ తెలిపారు.
ఇదీ చూడండి: Rahul lynching: '2014కు ముందు 'మూకదాడి' పదమే వినలేదు'
ఇదీ చూడండి: టీఎంసీదే 'కోల్కతా' పీఠం.. భాజపాపై దీదీ సెటైర్!