Woman Allegations on Minister Ambati: షాపు ఖాళీ చేయాలని వేధిస్తున్నారు.. మంత్రి అంబటిపై మహిళ ఆరోపణ

Woman Complaint on Minister Ambati Rambabu: మంత్రి అంబటి రాంబాబు.. ఆయన అనుచరులతో కలిసి వేధిస్తున్నారని.. ఓ మహిళ గుంటూరు జిల్లా ఎస్పీ కార్యాలయంలో జరిగే స్పందన కార్యక్రమంలో ఫిర్యాదు చేశారు. గుంటూరుకు చెందిన శివనాగమణీశ్వరి.. బ్రాడిపేటలోని అంబటి షాపింగ్ కాంప్లెక్స్​లో పింక్ అండ్ బ్లూస్ పేరిట ఓ బ్యూటీ పార్లర్ నిర్వహిస్తున్నారు. కాగా.. అద్దె సరిగా చెల్లించని కారణంగా ఆమెను ఖాళీ చేయించేందుకు అనుచరుల్ని పంపించినట్లు మహిళ ఆరోపించారు. రాత్రి వేళ వచ్చి బ్యూటీపార్లర్​కు తాళం వేసుకుని వెళ్లిపోయారని ఆమె తెలిపారు. ఖాళీ చేయటానికి సమయం అడిగినా కూడా ఇవ్వకుండా వేధిస్తున్నారని శివనాగమణీశ్వరి చెబుతున్నారు. తాను అడ్వాన్స్​గా ఇచ్చిన 3.60 లక్షలు రూపాయలు ఉన్నప్పటికీ.. షాపు ఖాళీ చేయాలంటూ వేధిస్తున్నారని ఆమె వాపోయింది. ఇప్పుడు అదే షాప్​ను బార్ కోసం అద్దెకు ఇస్తున్నారని, అందుకే తనపై ఒత్తిడి తెచ్చి ఖాళీ చేయిస్తున్నారని ఆరోపించారు. వేధింపులు భరించలేకే ఎస్పీ కార్యాలయంలో ఫిర్యాదు చేసినట్లు శివనాగమణీశ్వరి తెలిపారు.